Gańsipampki w szałołcie (Sałatka ze stokrotkami)

Jak żech pojechoł do Teściowyj, to mie coś wziyno[1] na jedzynie kwiołtkōw[2]. Nie żeby tam bōła[3] aż tako biyda[4], ale na wiosna bōło tam tyla kwiołtkôw, że czowiek chcioł sie nimi radować jeszcze jednym zmysłym. Kedyjś już żech takego gańsipamka jołd[5] i je łōn[6] richtig[7] delikatny, ale już taki kwiołtek łod szczypiorku to żech prōbowoł piyrszy rołz[8] w życiu. Jak zjycie[9] sie go w całojści, to wykrziwi Wōm[10] gymba[11] jak jaki mocny sznaps[12]. Ale take połōnczynie[13] delikatnych i łostrych, słodkich i kwaskowatych robi z tego szałołtu cojś richtig dobrego. Pamiyntejcie yno[14], żeby niy zbiyrać[15] tych kwiołtkōw kole autobany[16]!

Co potrza?[17]

połra[18] liści szałołtu[19] lodowego abo jakego inkszego, ale żeby fajnie chrupoł[20]
dwie gorści[21] rukoli
4 tōmaty[22]
2 jabka
połra rzodkewkōw
gorść gańsipampkōw
połra kwiotkōw ze szczypiorku
połra liści bazylii
syr[23] sałatkowy abo feta

Zôłza[24] vinegrette:
łyżeczka musztardy
łyżeczka miodu
łeżka[25] łoctu[26] winnego abo z jabkōw
łeżka soku ze citrōłny[27]
5 łeżek oliwy
5 łeżek łoleju[28] słōnecznikowego abo rzepakowego

Tomaty, jabka, rzodkewki i syr pokrejcie. Tyn szałołt, rukola i bazylia mogecie[29] sie potargać na mańsze kōnski[30] abo tyż pokrajać[31], ale nojlepi nożym ceramicznym. Kwiołtki szczypiorku potargejcie tak, żeby kołżdy[32] dzwōneczek bōł osobno. Wczajście[33] wszysko do jednyj miski i porzōndnie wymiyszejcie.[34]

Składniki zōłzy dejcie[35] do jaki miseczki i rozfyrlejcie.[36] Idzie to tyż wloć[37] do jaki krauzy[38] i poszelōntać niōm[39], ale po co mołcie marasić sie[40] jeszcze krauza.

Na stōł dejcie szałołt i osobno zōłza, niech sie kołżdy ji[41] tyla wleje, wiela bandzie[42] chcioł. A jakbyjście to zarozki[43] oblołli tōm zōłzom[44] i łostało[45] by co na drugi dziyń, to bajecie[46] to mieć całe klapniynte.[47]

Do grilla taki szałołt bydzie idealny. Smacznego 🙂

Gańsipampki w szałołcie

[1] wzięło

[2] kwiatków

[3] była; ō- samogłoska w wymowie między o i u

[4] bieda

[5] jadł

[6] on

[7] naprawdę

[8] pierwszy raz

[9] zjecie

[10] wam

[11] twarz

[12] wódka

[13] takie połączenie

[14] pamiętajcie tylko

[15] zbierać

[16] obok autostrady

[17] co będzie potrzebne

[18] kilka

[19] sałaty

[20] chrupiącej

[21] garście

[22] pomidory

[23] ser

[24] sos

[25] łyżka

[26] octu

[27] cytryny

[28] oleju

[29] możecie

[30] mniejsze kawałki

[31] pokroić

[32] każdy

[33] wrzućcie

[34] porządnie wymieszajcie

[35] proszę dać

[36] roztrzepcie, rozmieszajcie

[37] też wlać

[38] słoika

[39] wstrząsnąć nim

[40] jeszcze brudzić

[41] jej

[42] ile będzie chciał

[43] od razu

[44] oblali tym sosem

[45] zostało

[46] będziecie

[47] zwiędnięte

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *