Kupiōłech[1] się pozimki- tak na truskawki gołdała moja Ōłma, choć sōm na Ślōnsku take sztele[2], kaj gołdajōm[3] na nie edbery, np. w takim Świbiu. Miały być na deser, ale cojś mie tak naszło, żeby sie z nich zrobić szałołt[4] do pieczōnego wōsztu.[5] Do tego jeszcze wymyślōłech[6] sie fajno zōłza[7] i…żech to wszysko zezar.[8] Sam na dole mołcie[9] przepis na szałołt do jednego czowieka, bo ftedy[10] moja Baba[11] kajsik lołtała[12] i mitag[13] żech jołd sōm.[14] A Wōłs[15] jak baje[16] dwóch abo trzech, to wszyskego tyż dejcie[17] się wiyncyj.[18] Słodke, kwaśne, łorzechwy[19] smak rukoli, łocet[20] balsamiczny… niebo w gymbie.[21]
Co potrza?
gorść[22] rukoli
gorści roszpōnki
jabko
tōmata[23]
połra[24] pozimek
Zôłza:
łeżka[25] miodu
łeżka łoctu balsamicznego
łeżka oliwy
Te listki szałołtōw to mogecie potargać abo pokrajać[26] na mańsze kōnski.[27] Tōmaty łobiercie[28] ze skōry i pokrejcie, jabka tyż. Pozimki łobiercie i tyż je pokrejcie. Mogecie to wszysko wciepnôńć[29] do jednyj miski i wymiyszać[30], abo sie to poukłołdejcie[31] na talyrzu, jak na mojim zdjyńciu.[32] Składniki zōłzy wymiyszejcie i łoblyjcie[33] sie Wasz szałołt.
Smacznego 🙂
[1] kupiłem; ō- samogłoska w wymowie między o i u
[2] miejsca
[3] gdzie mówią
[4] sałatkę
[5] kiełbasy
[6] wymyśliłem
[7] sos
[8] zjadłem
[9] mają Państwo
[10] wtedy
[11] żona
[12] gdzieś biegała
[13] obiad
[14] jadłem sam
[15] was
[16] będzie
[17] dajcie
[18] więcej
[19] orzechowy
[20] ocet
[21] ustach
[22] garść
[23] pomidor
[24] kilka
[25] łyżka
[26] pokroić
[27] mniejsze kawałki
[28] obierzcie
[29] wrzucić
[30] wymieszać
[31] poukładajcie
[32] moim zdjęciu
[33] oblejcie
Dodaj komentarz