Nadziywane kwiołtki cukinii (Nadziewane kwiaty cukinii)




Wakacje sie skōńczōły, ale łostało[1] nōm kans[2] wspōmniyń, zdjyńć i urlopowych smakōw. Tak tyż je u mie z tymi kwiołtkami cukinii. T,e co je widać na zdjyńcu, uprowadziōł żech ze zygrōdki[3] łod Teściowyj i bōły to piyrsze kwiołtki cukinii, ftore żech jołd w życiu. Te sam nadziywołech mozzarellōm i suszōnymi tōmatami[4] i tōnkołech[5] je we cieście z dodatkym piwa- po co na poczōntek sie je robić za ajnfachowo?[6] 😉 A że mi i moji Babie zasmakowały, to jak żech pojechoł do Francji i znod żech je we sklepie, to sprōbowołech sie je zrobić barzi tradycyjnie: bez nadziynia i w normalnym naleśnikowym cieście. Te druge tyż bōły dobre, ale jak już pisać, to ło tych trocha udziwniōnych. Pamiyntejcie, żeby urywać yno te chopske[7] kwiołtki, bo z nich niy bydzie cukinii i zarozki to widać po łodydze. Te babske majōm łodyga, co wyglōndo jak mini cukinia, a te chopske tako owłosiōno- nawet chopy łod cukinii majōm zarost 😉 Te łodygi sie mogecie całkym łoberznōńć[8], żeby Wōm potyn żodyn bezuch[9] niy pedzioł,[10] żejście mu na talyrz wciepli szczury w cieście- jak to pedziała cera[11] łod moji kōmratki.[12]

 

Co potrza?

 

połra[13] kwiołtkōw cukini

jedna mozzarella

połra suszōnych tōmatōw

połra listkōw bazylii

 

Ciasto:

 

1 jajco
[14] szklōnki piwa
6 łeżek mōnki pszynny[15]
sōl i pieprz
łolyj[16]

 

Kwiołtki umyjcie i ze środka kołżdego[17] wyrwijcie pryncik- dejcie pozōr,[18] żebyjście nie rozwalyli przi okazji całego kwiołtka. Mozzarella, suszōne tōmaty i bazylia pokrejcie i wymiyszejcie sie w jaki misce. Przigotujcie sie tyż te ciasto: jajco rozfyrlejcie[19] mikserym, potyn wlyjcie tam piwo i wciepcie[20] mōnka, sōl, pieprz i porzōndnie wymiksujcie.

Teraz nadziywajcie kołżdy kwiołtek, a jak już baje połny, zakryńćie mu płatki na wiyrchu, żeby Wōm niy wyleciało te nadziynie. Tōnknijcie sie go w cieście i na rozgrzōny łolyj. Przipiyczcie go na złoto ze wszyskich strōn, wyciōngcie[21] na papirowy ryncznik, żeby te tuste trocha tam wsiōnkło[22] i… smacznego 🙂

 

Kebyście chcieli sie je zrobić we normalnym cieście naleśnikowym i bez nadziynia, to mogecie[23] sie dō nich potyn zrobić trocha jaki zōłzy:[24]

zōłza czoskowo-koperkowoł
zōłza jogurtowo
zōłza holynderskoł

(Kebyście chcieli sie znojś tako zōłza, to wpiszcie sie ji nazwa u gōry po prawyj, kaj je napisane: Szukej)

Smacznego 🙂

Nadziywane kwiołtki cukini- małe

[1] zostało

[2] dużo

[3] ogródka

[4] pomidorami

[5] zanurzałem

[6] prosto

[7] męskie

[8] odciąć

[9] goście

[10] powiedział

[11] córka

[12] koleżanki

[13] kilka

[14] pół

[15] łyżek pszennej mąki

[16] olej

[17] każdego

[18] uważajcie

[19] ubijcie

[20] wrzućcie

[21] wyciągnijcie

[22] wsiąknęło

[23] możecie

[24] sosu




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*