Ożarto wołowina (Boeuf à la bourguignon ;) )

Uwarzynie tego dania je łatwiyjsze, niż napisanie łod niego nazwy po francusku, a jak już je rołz1 narychtujecie,2 to potyn bajecie3 co jakiś czas do niego wrołcać. Joł noprzōd sie tym zainteresowōł, jak żech oglōndoł film „July i Julia”- fto go niy widzioł, tyn musi to nadrobić. Potyn, jak my z mojōm Babōm4 zaprołszali na bezuch nasza kōmratka,5 to żech łonyj napisoł, co by sie tak wymarzōła zjejś- niyrozki take pytania gościom zadołwōm6– a łona napisała, że boeuf bourguignon… i sie zaczło 😉 Nim cojsik takego nowego przirzōndza, to sprawdzōm połra receptōw,7 a potyn- jak jaki didżej- miksuja z tego swoja wersja, a przi okazji robia jeszcze połra eksperymyntōw. Wyszło dobre i wtedy, i na drugi rołz, i na trzeci… 😉

Co potrza?

0,5 kg wołowego miysa (keby8 Wōm w rynce9 wlecioł jaki wiynkszy kōnsek10, to sie go wejście11)

10 dkg wyndzōnki12

1 zōmbek czosku

1 cebula

1 marchewka

4 łeżki małych marynowanych cebulek

20-25 dkg pieczarkōw

1 łeżka kōncyntratu ze tōmatōw13

1,5 szklōnki czerwōnego wytrawnego wina

połra gałōnzkōw tymianku

połra gałōnzkōw pietruszki

ze 5 liści bobkowych14

0,5 litra buliōnu wołowego

masło klarowane

sōl, pieprz

trocha mōnki pszynnyj do zagynszczynia zōłzy

Nojlepi dziyń pryndzy15 pokroć te miyso na mańsze16 kōnski i polołć17 leko18 winym. Na drugi dziyń- a jak niy mołcie19 tela czasu, to mogecie zalołć ta wołowina yno20 na chwila- na rozgrzōnyj patelni, na 2 łeżkach masła klarowanego podpiyczcie pokrōno wyndzōnka. Jak sie podpiecze, to przełōżcie jōm do brytfanki (masło niech łostanie na patelni), a na patelnia wciepcie21 osuszōne miyso. Dejcie pozōr,22 żeby go niy bōło za kans,23 bo sie niy bydzie podpiykać, yno puści wodo i sie baje dusić. Jak sie całe miyso przibrōnołci,24 wlyjcie na patelnia wino i wszysko przelyjcie do brytfanki. Te wino, co to sie w nim marynowała wołowina, tyż sam wykorzystejcie. Do brytfanki wciepcie tymianek, pietruszka i liście laurowe (we Francji gołdajōm na to bouquet garni [buke garni]), mogecie je nawet razym zwiōnzać abo zrobić taki mały bojtlik25 ze gazy, bo na kōniec te zioła sie wyciepuje i lepi sie je wtedy znojś.26 Dodejcie sam jeszcze łeżka kōncyntratu, 0,5 litra buliōnu, wyciśniynty czosnek, pieprz i trocha soli- żeby jyj niy bōło za kans, to sie tyj zōłzy noprzōd skosztujcie. Piekarnik sie rozgrzyjcie pryndzy na 150 stopni i wrołźcie tam ta brytfanka na 2-3 godziny.

0,5 godziny przed kōńcym dociepcie do wołowiny: zeszklōno na maśle cebula i leko przismażōne pieczarki i marchewka.

Jak już te 2 abo 3 godziny minōm, wyciōngcie brytfanka ze piekarnika i tera mogecie leko zagyńścić ta zołza. Wyciōngcie sie na jaki talyrz wiynksze kōnski miysa, rozfyrlejcie27 ze 2 łeżki mōnki we pó28 szklōnki zimnyj wody, postołwcie brytfanka na małym łogniu na piecu i wlyjcie do ni29 rozfyrlano mōnka. Rozmiyszejcie sie to fajnie, niech ta zōłza połra razy bluknie30, wciepcie tam rajn31 zajś te miyso, żeby sie trocha ogrzoło i fertich.

Do taki ożartyj wołowiny nojlepi sie wziōńć bagetka, bo niōm idzie tōnkać zōłza i fajnie wypucować32 talyrz. Jak już bydziecie jōm naklołdać, to po wiyrchu mogecie jōm posuć pokrōnōm pietruszkōm. Smacznego 🙂

 

Ożarto wołowina- małe

1raz

2przygotujecie

3będziecie

4żoną

5koleżankę

6zadaję

7przepisów

8gdyby

9ręce

10kawałek

11zabierzcie

12boczku wędzonego

13pomidorów

14laurowych

15wcześniej

16mniejsze

17polać

18lekko

19mają Państwo

20tylko

21wrzućcie

22uważajcie

23dużo

24przyrumieni

25woreczek

26znaleźć

27roztrzaskajcie

28połowie

29niej

30zabulgocze

31do środka

32wyczyścić

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*