Szokoladowy piyniek ze 1921 roku (Czekoladowy pieniek)




Kōmratka[1] łod[2] moji Mutry[3] pożyczōła mi ksiōnżka, co jōm dostała łod swoji Mutry i to zarozki[4] po swoim ślubie. Skōnd[5] ta drugoł jōm miała, nie wia,[6] ale wiym, kedy bōła wydanoł… w 1921 roku we Breslau. I jak to ze takimi starymi ksiōnżkami niyrołzki[7] je[8], je napisanoł gotykym- bo to, że je po niymiecku, to je chyba normalne do ksiōnżek ze Breslau. Jako, że moł tyn kochbuch[9] tera swōj 95 gyburtstag, to żech sie pomyśloł, że trza by to jakosik pofajrować.[10] Jako pirszy recept[11] wezna sie co słodkiego i cojś do czego niy trza dołwać[12] 15 abo 20 jajec- niy ma leko[13] znojś tam taki recept. Powia yno jeszcze, że nazywo sie łōna „Schlesisches Kochbuch” („Kuchnia śląska”), ale jak tak człowiek wejrzi[14] na te recepty, to to bōła tako ksiōnżka barzi do takich pańciōw ze Breslau, niż do kobiytōw ze familoka 😉

Co potrza?

6 jajec

125 g cukru

60 g mōnki[15] pszynnyj

60 g mōnki kartołflanyj[16]

120 g masła

trocha pokrōnych[17] pistacji

Filowanie:[18]

200 g masła

100 g cukru pudru (we recepcie bōło 200 g, ale to wyszło take słodke, że jedna moja kōmratka padała,[19] że już tera bez cały tydziyń niy bydzie musiała cukrować[20] tyju[21])

200 g rozpuszczōnyj[22] szokolady

aromat waniliowy abo wydropany ze środka laski waniliowyj miōnższ

 

Nojprzōd[23] trza narychtować[24] tyn filung. Rozpuśćcie sie szokolada w jaki misce nad wrzōncōm wodom. Masło rozrōbcie mikserym na smiytōnka- normalnie trza by to uciyrać i jak mołcie[25] za kans[26] czasu, to sie mogecie wziōńć jako miska, warzecha i to bez pó[27] godziny uciyrać. Inksi niech włōnczōm mikser i nawet zaroz mogōm do tego dodać tyn cuker i to fajnie rozmiyszać. Potyn yno dodejcie tam ta szokolada, trocha pomiksujcie i fertich.[28]

Tera sie bierymy za ciasto. Jajca ubijcie ze cukrym na garcu, we wtorym[29] wrze woda, ale dejcie pozōr,[30] żeby ta miska niy wlazła Wōm całoł do tego garca i żeby niy bōło za ciepło, bo sie te jajca zetnōm i po robocie. Potyn ściōngcie miska z tego gorka, dejcie przesiōne mōnki i łozpuszczōne masło. Piec rozgrzyjcie na 160 stopni. Wejście sie tako wiynkszo blacha- tako, co to je na wyposażyniu pieca. Rozciōngcie na ni[31] papiōr do pieczynia i wylyjcie na niego te ciasto. To, że we recepcie niy ma proszku do pieczynia, to niy je fyjler,[32] bo w tamtych czasach jeszcze niyftorzi go niy używali, a i bez tego proszku mie to fajnie wyrosło. Wrojście[33] blacha do pieca na 20 min- jak sie ciasto zrobi take barzi złote, to wyciōngejcie. Potyn rozciōngcie sie na stole ryncznik do naczyń, przeciepcie na niego upieczone ciasto i ściōngcie z niego papiōr do pieczynia. Tera posmarujcie je po wiyrchu[34] tym filungym i spróbujcie zawinōńć je jak rolada- yno niy okryncejcie ji[35] niciom 😉 Dobrze by bōło przełożyć te ciasto na papiōr do pieczynia, bo bydymy je za chwila całe smarować szokoladowōm kryjmōm. Nim to zrobiymy, oberznijcie na szryjk[36] kōńcōwki tyj rolady i bierymy sie za szmirowanie.[37] Jak już nasz cały piyniek bydzie szokoladowy, to po wiyrchu posujcie[38] go jeszcze pokrōnymi pistacjami, dejcie go na trocha do lodówki, żeby ta kryjma nōm stwardła i fertich. Smacznego  🙂

Szokoladowy piyniek- małe

 

 

[1] koleżanka

[2] od

[3] mama

[4] zaraz

[5] skąd

[6] wiem

[7] nieraz

[8] jest

[9] książka kucharska

[10] uczcić

[11] przepis

[12] dawać

[13] lekko

[14] popatrzy

[15] mąki

[16] ziemniaczanej

[17] pokrojonych

[18] nadzienie

[19] powiedziała

[20] słodzić

[21] herbaty

[22] stopionej

[23] najpierw

[24] przygotować

[25] mają Państwo

[26] dużo

[27] pół

[28] gotowe

[29] którym

[30] uważajcie

[31] niej

[32] błąd

[33] włóżcie

[34] górze

[35] jej

[36] ukośnie

[37] rozsmarowywanie

[38] posypcie




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*