Kakaōwka (Kakaowy likier jajeczny)

Idzie pedzieć,1 że kakaōwka to je siostra ajerkōniaku, yno że po inkszym fatrze.2 I niby tam wszysko prawie take same, ale sōm ludzie, co to jak im postawić na stole ajerkōniak i kakaōwka, to zarozki3 sie ciepnōm4 na tyn trocha ciymniyjszy keliszek. Nojlepi mieć i jedne, i druge, to mogecie być sicher,5 że kołżdymu dogodzicie… choć i sam moge być problym, bo trza by mieć jeszcze w barku trocha czystyj i wtedy to już mogōm sie Wōm do dōm ciś6 i nojbarzi rozbestwiōne bezuchy7 😉

Co potrza?

6 żōłtek

szklōnka cukru

125 g masła

cuker waniliowy abo arōmat (abo trocha gorzołki8, we ftoryj bōła9 zamoczōno laska wanilii)

2 łeżki kakao

jedna halba10 (czystyj)

Moja Teściowo gołdała,11 że masło trza uciyrać ze cukrym (i cukrym waniliowym) we ceramicznyj misce, ale joł je na to za zgniōły12 i żech to wciep do plastikowyj miski i włōnczōł mikser. Za chwila żech dociep13 tam żōłtka, kakao i miksowoł, aż cuker sie rozpuściōł- tak sie strasznie z tym niy smōlcie,14 bo jak przidzie gorzołka, to sie to jeszcze lepi rozpuści. Tera wlywejcie pomału ta halba i dali miksujcie. Spróbujcie, czy cuker sie dobrze łozpuściōł,15 a jak wszysko sie dobrze połōnczōło, to mogecie16 to jeszcze przecedzić bez17 sitko- żeby wychycić kołżdy niyrozpuszczōny kōnsek18 cukru- i idzie19 ta kakaōwka wlywać do flaszki abo jaki krauzy20– niyftorzi21 nojbarzi22 lubiōm, jak łona23 tak fajnie stwardnie we lodōwce i potyn idzie jōm wylizywać ze keliszka- jak udo Wōm sie ta kakaōwka tam wlołć 😉 Bez to nawet lepi jōm wtedy trzimać we krauzie.

Joł żech jednak je zgniōły do potyngi i jak żech to robiōł na drugi rołz, to żech sie pomyśloł, że trza by sam wynalyjś jeszcze barzi ajnfachowo24 wersja. Mōm taki blynder ze dzbōnkym25 i sprōbowoł żech tam noprzōd wciepnōńć żōłtka, masło, cuker, kakao i chwila to poblyndować. Potyn żech tam wloł gorzołka, włōnczōł i to sie robiōło, a joł żech sie mōg nawet i kafeju napić. Wszysko sie idealnie połōnczōło, a w kuchni bōło mani marasu26– bo jak sie to robi mikserym, to niystety trocha pryskoł. Idzie pedzieć: mocie blynder, to mocie mani roboty 😉

Smacznego abo raczyj: prost! 🙂

Kakaōwka- małe

1 powiedzieć

2 ojcu

3 zaraz

4 rzucą

5 pewni

6 wchodzić

7 goście

8 wódki

9 była

100,5 litra wódki

11 mówiła

12 leniwy

13 dorzucił

14 przejmujcie

15 rozpuścił

16 możecie

17 przez

18 kawałek

19 można

20 słoika

21 niektórzy

22 najbardziej

23 on

24 prostą

25 dzbankiem

26 mniej brudu

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




2 Komentarze

Dodaj komentarz

Twój adres email nie zostanie opublikowany.


*