Chōdny syrnik łod ciotki Krysi (Sernik na zimno)

Jeszcze niy tak dołwno[1] niyftorzi[2] narzykali, że im za gorko,[3] ale już teraz paczōm[4] we niebo i wypatrujōm słońca, bo im sie miyrznie[5] tyn dyszcz. Joł[6] tyż mōm nadzieja, że jeszcze bydzie trocha tego słońca i- jak bez lato- bydzie sie szło zrobić tyn chōdny syrnik. Robi sie go szybko, a do tego je bardzo dobry. Recept[7] je od ciotki Krysi, co to po ślōnsku niby sie nazywo Krista, ale ciotka Krista- a tak richtig[8] to Christa- to je inkszo ciotka, co to miyszko w Niymcach… no i szlus[9] 😉

Co potrza?

 

0,5 kg syrka waniliowego

0,5 szklōnki cukru

0,5 litra śmiytōnki[10] 36%

śmietanfix (choć jak go niy dołcie, to sie nic niy stanie)

galaretka citrōłnowo[11]

skōrka ze jednyj citrōłny

sok ze połōwki citrołny

 

Na wiyrch[12] i na spodek:

ze 160 g biszkoptōw- nojlepsze sōm te take jynzyczki, bo idzie je fajnie pokruszyć

[13] kostki masła

 

Łozpuście[14] sie ta galaretka we niycałyj szklōnce wrzōntku i poczekejcie, aż trocha ochōdnie.[15] Śmiytonka ubijcie, pod kōniec wciepcie cuker- mogecie tyż wciepnōńć[16] tyn śmiytanfix. Pomału wciepujcie tyn syrek, ta otartoł skōrka, sok i chōdno galaretka (powinna już leko[17] tynżeć[18]).

 

Te biszkopty wrołźcie[19] do jaki tasie[20] abo woreczka i pokruszcie nudelkulōm abo i jakim motkym[21]– choć z tym motkym to by już boła przesada. Rozrōbcie te pokruszōne biszkopty potyn[22] ze masłym. Przigotujcie sie forma na torta. I tera zależy od Wołs, jako chcecie mieć rozsute[23] te biszkopty. Mogecie sie dać pó na pó- na dōł i na gōra, abo wiyncyj na dōł- tu już sie liczy Wasza inwyncja. Joł robiōł to w taki silikōnowyj formie i bez to dołech wiyncyj na dōł, żeby potyn- jak byda to przewrołcoł na jaki talyrz- lepi[24] mi to odeszło od tego dna.

Na dół biszkopty, na to wylyjcie ta syrnikowo masa i na wiyrch zajś biszkopty. Tera potrza[25] ciyrpliwojści, żeby to stwardło i… smacznego 🙂

 

Chodny syrnik łod ciotki Krysi- małe

[1] niedawno

[2] niektórzy

[3] za gorąco

[4] spoglądają

[5] nudzi

[6] ja

[7] przepis

[8] na prawdę

[9] koniec

[10] śmietana

[11] cytrynowa

[12] górę

[13] pół

[14] rozpuście

[15] ostygnie

[16] wrzucić

[17] lekko

[18] tężeć

[19] włóżcie

[20] torby

[21] młotkiem

[22] później

[23] rozsypane

[24] lepiej

[25] potrzeba

3 thoughts on “Chōdny syrnik łod ciotki Krysi (Sernik na zimno)

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *