Mule ze śmiytōnkōm i wyndzōnkōm (Mule w sosie śmietanowym aromatyzowanym boczkiem)

Je żech ciekawy, co by na to pedziała[1] moja Ōłma. Tak się myśla, czy łōna[2] aby kedy[3] widziała je kaj[4] na jakim łobrołzku.[5] Dyć wia,[6] że kans[7] ludzi, co żyje dzisiej, tyż nigdy łonych niy jadło. Joł i moja Baba je fest[8] lubiymy i bez to jak je kaj znojdymy, to lōndujōm[9] we naszym  koszyku. We restauracji trzeba za nie nirozki zapłacić kans piniyndzy, a w dōma- po tōniu[10]– mogecie mieć za to łonych[11] połny dymfer[12] ; )

Co potrza?

1 kg muli
10-15 dkg wyndzōnki[13] (jak sie weźniecie tako, co to już je pokrōno we pudełku, to bajecie mieć mani[14] roboty)
200 ml śmiytōnki[15]
1 cebula
keliszek biołego wina
trocha masła klarowanego
kapka[16] oliwy
trocha natki pietruszki
pieprz  (soli nirozki wcale wiyncyj niy trza,[17] bo wyndzōnka je słōnoł[18])

Wejście[19] sie jako szczotka i kołżdo muszelka sie pod bieżōncōm wodōm fajnie opucujcie.[20] Dejcie pozōr:[21] jak ftoro[22] muszla je otwartoł, to trza jōm wyczajś,[23] bo ta mula we środku je zdechniynto! Dejcie[24] sie do gorka trocha masła klarowanego, wciepcie[25] tam ta wyndzōnka i trocha jōm podpiyczcie. Potyn dejcie tam pokrōno[26] cebula, kapnijcie do smaku trocha oliwy i leko[27] zeszklijcie ta cebula. Tera wlyjcie wino, niech sie ze 2 razy bluknie[28] i dejcie tam śmiytōnka. Mogecie dać ździebko[29] pieprzu abo i soli (nojprzōd sie sprōbujcie, czy niy baje[30] za słone).
Wciepcie do tego jeszcze trocha pokrōnyj natki i te mule. Przikryjcie tyn gornek i niech sie przez 5 min. powarzōm.[31] Keby sie jake bajtle[32] pytali, co to robicie w tym gorku, to lepi niy gołdejcie,[33] że masowy mord, bo jeszcze Wōłs zawrzōm[34] w hereście.[35]
W tym gorku mogecie je tyż od czasu do czasu pomiyszać. I jak już bajecie widzieć, że wszyske muszle sōm łotwarte, to mōmy to fertich.[36]
Kebyście na talyrzu potyn widzieli, że jako muszla je zawarto, ji[37] lepi niy jydzcie, bo łona mogła tyż być już pryndzy[38] zdechniynto.

Do tego nojlepszo baje bagietka, bo niōm idzie fajnie sie tōnkać[39] we zōłzie[40]… smacznego 🙂

 

Mule ze śmiytonkom i wyndzonkom- małe

 

[1] powiedziała

[2] ona; ō samogłoska w wymowie pomiędzy o i u

[3] kiedyś

[4] gdzieś

[5] obrazku

[6] choć wiem

[7] dużo

[8] bardzo

[9] lądują

[10] tanio

[11] ich (muli)

[12] duży garnek dawniej używany do gotowania prania

[13] wędzonego boczku

[14] mniej

[15] śmietany

[16] trochę

[17] nie potrzeba

[18] słona

[19] proszę wziąć

[20] oczyśćcie

[21] uważajcie

[22] któraś

[23] trzeba ją wyrzucić

[24] dajcie

[25] wrzućcie

[26] pokrojoną

[27] lekko

[28] zabulgocze

[29] trochę

[30] będzie

[31] pogotują

[32] dzieci

[33] nie mówcie

[34] zamkną

[35] więzieniu

[36] gotowe

[37] jej

[38] wcześniej

[39] zamoczyć

[40] sosie

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *