Drożdżowe Hydraulika  (i wszystko jasne ;) )

A z tym drożdżowym to bōło tak: prziszoł rołz1 hydraulik sprawdzić instalacja i jak łobejrzoł pustoł blacha, to jakosik my sie dali do gołdki2 ło pieczyniu. I łon tu narozki padoł3, że moł taki recept4 na drożdżowe, co to jego „babcia robiła 100 lat przed wojną”- pedzioł tak, bo to bōł hadziaj5, ale że recept bōł fajny, to żech sie go zarozki6 zapisoł. Te drożdżowe je tak ajnfachowe7, że kołżdymu sie musi udać. Na wiyrch8 idzie wciepnōńć byle co, a to wszystko na takim miynkim spodku- Ōłma łod moji Baby by padała: międziutkie 😉

Co potrza?
3 jajca
1 szklōnka cukru
1 szklōnka mlyka
1 szklōnka łoleju
1/2 paczki drożdży  (5 dkg)
3 szklōnki mōnki pszynny

Na wiyrch idzie dać, co Wōm sie uwidzi: jabka, śliwki, brzoskwinie, banany… yno pamiyntejcie, żeby niy bōło tego za kans9, bo owoce puszczajōm zaft10 i żeby Wōm tego ciasta niy przemoczōły.

Do jaki miski na wieczōr wciepcie jajca, cuker, mlyko, łolyj i drożdże. Pomiyszejcie yno byle jak jakōm warzechōm i na całoł noc wrojście do lodōwki- niy, niy ogup żech 😉 Na drugi dziyń wsujcie do tego mōnka, wymiksujcie i odstołwcie do wyrośnięcia (tak ze 1 godzina niech sie to postoji). Włōnczcie sie piec na 180 stopni. Przelyjcie ciasto na blacha, na wiyrch dejcie owoce i rajn11 do pieca na około 40 minut- zależy łod tego, co dołcie na wiyrch, bo niyroz moge i siedzieć we bratrurze12 godzina. Co tu dużo gołdać, trza wachować13, a potyn- już yno smacznego 🙂

Drożdżowe hydraulika-małe

1raz

2rozmowy

3powiedział

4przepis

5nie Ślązak

6zaraz

7proste

8górę

9dużo

10sok

11do środka

12piekarniku

13pilnować

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *