Chlyb z gorka miyszany na zakwasie

Pōnojś te chleby na zakwasie sōm zdrowsze, bo bakterie ze zakwasu, kere pomołgajōm przi rychtowaniu1 tego chleba, rozkłołdajōm wynglowodany, glutyn na mańsze kōnski i wyciōngajōm ze mōnki minerały, kere bydymy umieli lepi przetrołwić. Przi okazji powstołwajōm roztomajte kwasy, bez kere tyn chlyb na zakwasie je bogatszy we smaku.

Co potrza?

4 szklōnki mōnki pszynnyj (zorta2 750; jedna szklōnka moł 12-130 g)

1 szklōnka mōnki pszynnyj razowyj

1 szklōnka mōnki żytniyj razowyj

10 g soli (2 łeżeczki)

2 łeżki masła (50 g)

1,5 szklōnki ciepłyj wody

poła szklōnki zakwasu (recept znojdziecie sam: https://chopwkuchni.pl/?p=1510 )

Piyrszy etap nojlepi zrobić na wieczōr dziyń przed pieczyniym (mogecie to tyż zrobić rano, a na wieczōr napocznōńć pieczynie). Wlyjcie do miski woda, zakwas i dejcie tam szklōnka mōnki pszynnyj razowy, szklōnka żytniyj razowyj, wymiyszejcie to byle jak i odstołwcie w jake ciepłe miejsce.

Na drugi dziyń dejcie tam jeszcze 4 szklōnki mōnki pszynnyj (750), sōl i łozpuszczōne masło. Wyrōbcie to porzōndnie (mołcie przed sobōm połra minut znyncania sie nad tym kōnskym mōnki i wody). Jak już bydzie fajnie sie łozciōngać3, wysypcie na spodek miski trocha mōnki, przeciepcie tam wyrobiōno kulka ciasta i dejcie bakteriōm trocha podziałać (na wiyrch tyz mogecie nasuć trocha mōnki). Odstołwcie to na 2-3 godziny w jake ciepłe miejsce. Joł łozgrzywōm4 na chwila bratruła, wyłōnczōm i wrołżōm5 tam ta miska.

Jak już wyrojśnie, to do bratruły wrojście naczynie żaroodporne abo brytfanka, we keryj bydziecie piyc tyn chlyb i łozgrzyjcie piec do 220 stopni. Wyciōngcie naczynie, wciepcie dō niego chlyb, przikryjcie i wrojście do pieca. Bez 10 minut niech sie to piecze na 220, potyn 20 minut na 200 stopni. Jak już minie tyn czas, to ściōngcie pokrywka ze tego naczynia abo brytfanki i niech sie to jeszcze tak popiecze bez 20-30 minut. Musicie wachować6, jak wyglōndo skōrka- keby bōła za jasnoł, to bydzie potrzebowoł tyn chlyb niy 20, a 30 minut.

Jak już bydzie fajnie przibrōnołcōny7, to wyciōngcie go ze bratruły i brytfanki i niech sie ochōdzi na jaki kratce. A potyn to już yno ździebko masła, fetu i… smacznego 🙂

 

 

1robieniu

2typ

3rozciągać

4rozgrzewam

5wkładam

6pilnować

7przypieczony

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*