Jochanki we szokoladzie (Czerwona porzeczka w czekoladzie)

To je tak po prołwdzie¹ takoł wariacja na tymat ajnfachowego² murzynka. Lubia, kej³ słodycz je przełōmano czymś kwajśnym, a do tego jeszcze tyn szokoladowy smak… niy ma co pisać- sprōbujcie 🙂

Te składniki bydōm na wiynkszo, sztyrogato⁴ blacha.

Co potrza?

300 g masła (niy myślcie ô cholesterolu 😉 )

1/4 szklōnki mlyka

3 łeżki kakao

1,5 szklōnki cukru

2 szklōnki mōnki

4 jajca

2 łeżeczki proszku do pieczynioł

trocha soli

300 g jochanek⁵

Masło, mlyko, kakao i cuker dejcie do gorka i powarzcie na małym ôgniu, aż sie z tego narychtuje jednolity syrop. Ochōdźcie⁶ go i ôdbiercie połra łeżek do jaki szolki⁷ (bydzie do polōnia po wiyrchu po upieczyniu). Ubijcie biołka (mogecie tam dać ździebko⁸ soli). Niyskorzi do ochōdzōnyj masy dejcie żōłtka, mōnka, proszek do pieczynioł i dobrze to wymiksujcie. Na kōniec wmiyszejcie do tego ubite biołka.

Łozgrzyjcie bratruła⁹ na 180 stopni. Masa przelyjcie do formy, połozciepujcie¹⁰ po wiyrchu jochanki i wrojście te ciasto na 45-50 minut do pieca.

Jak baje¹¹ upieczōne, to posmarujcie je po wiyrchu jeszcze tym syropym, ochōdźcie i… smacznego 🙂