Klopse rybne ôd Tanty Eldzy (Klopsiki rybne Cioci Eli)

Na kŏżdym fajerze¹ u Tanty² Eldzy bōły take fajne małe klopse ze rybōw, kere wartko sie traciōły³. Szło by pedzieć, że to take bratheringi⁴, yno trocha przemelane⁵ bez flajszmaszyna⁶. Ône tyż sōm we zalywie ze ôctu i bez to mogecie je we zimnym nawet i ze dwa tydnie potrzimać, choć mie sie zdŏ, że aż tyla to niy wytrzimiecie i za pŏra dni je zezrecie 😉

Co potrza?

500 g zielōnych śledzi (niy bōjcie sie- ône niy majōm zielōnyj farby, yno tak sie gŏdo na surowe filety ze śledzia)

1 żymła⁷

2 cebule

1 jajco

tarto bōłka

połra listkōw bobkowych

połra kulek ziela angelskego

sōl i pieprz

łeżka cukru

1/2 szklōnki ôctu winnego abo ze jabek (choc po tōniu bydzie z ôctym szpyrytusowym)

olyj do smażynio

łeżka masła klarowanego

liter wody

jŏ żech doł tyż poła łeżeczki gorczycy i pŏra kulek zielōnego pieprzu

Żymła zamoczcie we wodzie. Śledzie pomelejcie bez maszynka, dociepcie tam poła cebuli, a na kōniec wyciśniynto ze wody żymła. Dejcie do tego niyskorzi jajco (surowe), sōl i pieprz. Ukulejcie małe kulki i obturlejcie we tartyj bōłce. Łozgrzyjcie na patelni olyj i piyczcie na nim klopse. Jak już bydōm fajnie przibrōnołcōne⁸, to je przełōżcie do jaki srogi krauzy abo małego bōnclŏka⁹.

Terŏzki trza narychtować zalywa. Pokrejcie cebula i zeszklijcie na łeżce masła klarowanego. Niyskorzi dolyjcie tam liter wody, 1/2 szklōnki ôctu, dejcie sōl, pieprz, ziele angelske, liście bobkowe, łeżka cukru (mogecie tyż dać gorczyca abo kulki zielōnego pieprzu) i niech sie to chwila powarzi. Na sōm kōniec trza zalŏć te kulki zalywōm, na wiyrch¹⁰ dać pŏra łeżek tego oleju ze smażyniŏ i dać im sie przegryjś- aby 24 godziny. Smacznego 🙂