Kokoski, kokosanki abo makrōłny ze kōłkōsraszpli

Sōm¹ ludzie, kere² na kokos niy mogōm nawet wejrzeć i ôni by pryndzyj ze godu padli, jak sie jedna zmaszkyciyli³… całe szczyńście jŏ kokos lubia. Yno mi sam niy gŏdejcie, że makrōłny to yno te ciastka ze ôdpustu ze bōłkōm tartōm, kero miała udŏwać mandle 😉 Jak chcecie, to mogecie do tyj ubityj piany dać i szpyrki⁴… to by bōły take makrōłny do piwa 😉

Recepty⁵ na kokosanki sōm prawie wszyndzie take same, ône sōm take trocha za słodke i mdłe, a mie korciōło, zeby sam co zmiynić… i dodołech startŏ skōrka ze citrōłny⁶. Już nigdy niy byda robić inkszych, bo te sōm dlō mie idealne.

Bierymy sie za robota.

Co potrza?

4 biołka

pó szklōnki cukru

200 g kōłkōsraszpli

skōrka ôbtartŏ ze jednyj citrōłny

łozpuszczōnŏ łeżka masła

Ubijcie na sztywno piana te biołka ze cukrym. Potyn wmiyszejcie do tego kokos, dejcie masło i potartŏ skōrka ze citrōłny. Nagrzyjcie bratruła⁷ na 160 stopni. Na blacha łeżeczkōm wykłodejcie take małe abo wiynksze kōłka tyj masy, mogecie je tyż robić na takich małych opłatkach. Niyskorzi⁸ wrojście blacha do bratruły na 15-20 minut. Tak po 5 minutach mogecie ta tymperatura zmniyjszyć na 150 stopni. A jak już bydōm fajnie przibrōnŏcōne, to lekko uchylcie drzwi ôd bratruły i niech sie jeszcze te makrōłny trocha posuszōm.

Bydōm chrupiōnce po wiyrchu⁹ i fajnie miynke driny¹⁰… Biercie sie za nie… Smacznego 🙂