Jakosik tak mie przi niydzieli naszło na eksperymynty. Miołech1 fajno kula szinki wieprzowyj i cukinia ze zygrōdki2, takŏ richtich3 swojskŏ. To żech sie pomyśloł, że może narychtuja4 zōłza z cukiniōm i może wtedy moja cera5, kero za niōm niy przepadoł, dŏ sie nabrać i zjy trocha tyj cukinii. Zōłza wyszła richtich fajnŏ, idealnŏ gynstość, fajnie kryjmowŏ, delikatny smak… cera na nia yno wejrzała i pedziła: niy byda tego jejś… i warz6 tu Chopie bajtlōm 😉
Co potrza?
kula ze szinki (ta moja miała trocha pōnad kilo)
jedna średniŏ cukinia
dwie gałōnzki rozmaryjōnu7
ze 2-3 liście laurowe
trocha tymianku i majerōnku (jŏ żech je mioł wszyjsko świyże, ze dōniczki)
trocha lubczyku
sōl i pieprz
keliszek biołego wytrawnego wina (abo półwytrawnego)
Szinka podpiyczcie ze wszyjskich strōn na tyglu8. Do brytfanki wlyjcie wino, wciepcie zioła, sōl, pieprz i cukinia. Niech sie to terŏzki tak aby dwie godziny podusi na małym ôgniu- u mie bōły to chyba 4. Niyskorzyj9 wyciōngcie miyso i pokrejcie we szajby, wyciepcie ze brytfanki zioła (smak już je driny10), a cukinia zblyndujcie ze tym wywarym. Mogecie sie ta zōłza jeszcze trocha doprawić do smaku. Dejcie ku tymu nazŏd miyso, żeby sie zagrzoło i idzie sie brać za nakrywanie stołu.
Zdjyńcie zrobiōłech przed duszyniym i bez to ta zielynina mŏ taka fajnŏ farba11. Smacznego 🙂
1miałem
2ogródka
3naprawdę
4przygotuję
5córka
6gotuj
7rozmarynu
8patelni
9później
10w środku
11kolor
