Chlyb ze niyspodziankōm

Jak żech rajzowoł^¹ po Rumuniji, to żech we jednyj restauracyji (jako to sie zarŏzki^² rymuje 😉 ) jŏd^³ szinka ze syrym zapiykanŏ we chlebie. Smakowało to richtich^⁴ fajnie i żech sie pomyśłoł, że to je dobrŏ idyjŏ^⁵ do wynŏkwianiŏ^⁶. Driny^⁷ sam je miyso mielōne ze hańdyka^⁸, wyndzōnka^⁹ i dwa syry (mimolette i mozzarella), ale sam mŏgecie^¹⁰ richtich kans improwizować.

Co potrza?

Chlyb:

200 g mōnki żytniyj (jŏ żech mioł takŏ 720)

300 g mōnki przynnyj (u mie była 550)

15 g drożdży

350 g wody

łeżeczka cukru

pōtora łeżeczki soli

Filōng/nadziynie:

500 g miysa ze hańdyka

100 g wyndzōnki

2-3 zōmbki czosku

poła łeżeczki wyndzōnyj papryki

poła słodkyj papryki

sōl i pieprz

połra gorści^¹¹ tartego syra (zależy ôd tego, wiela bydziecie mieć tych chlebkōw; u mie bōły dwa wiynksze i dwa mańsze- trza liczyc gorść na chlebek)

Mōnka wsujcie^¹² do jaki wiynkszyj miski, dejcie postrzodku^¹³ letniyj wody, wciepcie tam cuker i drożdże. Jak już drożdże napocznōm robić (aby 15 minut na to zleci), to wciepcie tam soli i biercie sie za wyrŏbianie. U mie robiōł to blank ajnfachowy^¹⁴ robot kuchynn, a jŏ żech mioł czas na sprzōntanie 😉 Jak niy mŏcie robota, to aby 15 minut musicie sie trŏpić^¹⁵ rynkŏm. Potyn ôdstŏwcie ciasto aby na godzina i zajś trocha wyrŏbiejcie. Niyskorzi dejcie je na bok i niech sie na spokojnie rojśnie- to mogōm być i dwie godziny.

Bez tyn czas mogecie narychtować farsz. Na tygel^¹⁶ dejcie pokrōnŏ wyndzōnka i jōm podpiyczcie, potyn wyciście tam czosnek i dejcie mielōne miyso i prziprawy. Jak sie to razym trocha przibrōnŏłci^¹⁷, to mŏcie to fertich^¹⁸.

Na biyrkownica^¹⁹ abo blat nasujcie mōnki, podzielcie ciasto na kōnski i uformujcie ze kŏżdego placek. Na postrzodku dejcie miyso, nasujcie na to syra i mogecie zawiyrać te smakołyki we chlebie. Przełōżcie je na blacha i niech jeszcze trocha sie tyn chlyb ôdpocznie, a niyskorzyj dejcie go do bratruły i włōnczcie jōm na 200 stopni, niech tam posiedzi godzina. A potyn już yno: smacznego 🙂