Tuste ze bakłażanym i ôrzechōma (Smalec z bakłażanem i orzechami)

Jak by fto^¹ szukoł dietetycznego jedzynia, to nawet niy mo sam co czytać. Za starego piyrwy^² ludzie mieli biyda^³ i bez to kołżdo czyńść świni trza bōło^⁴ jakosik przerobić. Tuste (abo niyftorzi tyż gołdajōm^⁵ na to fet), kere^⁶ ôni^⁷ wtedy robiyli, bōło ajnfachowe^⁸– yno ze szpyrkami^⁹, te nasze to już je czyste wynołkwianie^¹⁰. Trocha mie zainspirowała kuchnia gruzińskoł, ale je tam tyż prziprawa, kero je charakterystyczno dlo kuchni bułgarskij. Dugo by szło jeszcze gołdać, ale jedne musza Wōm pedzieć^¹¹: za takim fetym to idzie ôgupieć^¹² 😉

Co potrza?

25 dkg szpeku^¹³

gorść ôrzechōw

10 dkg bakłażana

1 łeżeczka czubrycy

0,5 mielōnyj kolyndry (ziorek)

sōl i pieprz

Bakłażana pokrejcie^¹⁴ we kosteczka, posypcie go solōm i ôdstołwcie^¹⁵ na chwila, żeby pōściōł sok- niy bydzie wtedy za gorzki. Szpek tyż sie pokrejcie we kosteczka i po leku mogecie go we jakim gorku skwarzić^¹⁶– ftojś mi pedzioł, że jak sie doł^¹⁷ tam trocha soli, to tyn fet niy bydzie pyrskać^¹⁸. Jak już bakłażan puści sok, to go przepōkejcie^¹⁹ i wysuszcie papiyrowym ryncznikym. Ôzgrzyjcie sie bratruła^²⁰ na 200 stopni, rozłōżcie tego bakłażana na jaki blasze i dejcie go rajn^²¹ na 10 minut. Pod kōniec dociepcie tam tyż na chwila ôrzechy. Jak już szpyrki bydōm fajnie wyskwarzōne, to wciepcie tam tego bakłażana, ôrzechy i prziprawy, połra razy to pomiyszejcie i wlyjcie do jaki miski abo bōnclołka^²². A jak ôchōdnie^²³, to sie ukrajcie^²⁴ sznita^²⁵ nojlepszego chleba, posmarujcie i… smacznego 🙂