Chlyb bez mōnki- bezglutynowy (Chleb bez mąki)

Niyftorzi¹, jak widzōm take miano², zarŏzki³ sie chytajōm⁴ za gowa, ale jak fto je na diecie bezglutynowej, to dlo niego niy ma to wcale take dziwne. Je w tym chlebie mało wynglowodanōw i bez to wszyjske te ludzie, kere je ôgraniczajōm, majōm sam recept na zdrowe kalorie. Mōmy sam hawefloki⁵ i ône niby majōm kans wynglowodanōw, ale cojsik musi to wszyjsko zlepić cuzamyn⁶. Prōbowołech nawet narychtować chlyb taki prawie bez wynglowodanōw, ale sie potyn łozlecioł⁷ 😉

Co potrza?

2 szklōnki haweflokōw

1 szklōnka pomelanych⁸ kōłkōsraszpli⁹ (niyftorzi na to gŏdajōm mōnka kokosowŏ 😉 )

1 szklōnka ziorek¹⁰ słōnecznika

1 szklōnka pomelanych mandli¹¹

0,5 szklōnki sezamu

0,5 szklōnki ziorek lnu

0,5 szklōnki pomelanych orzechōw włoskich

2 łeżeczki czarnuszki

2 łeżeczki soli

6 łeżek oliwy

1 łeżka miodu

3 szklōnki wody

Kebyjście niy mieli jakego składnika, to sie gowy niy łōmcie¹², yno dejcie czego inkszego- przeca niy idzie sie bŏć improwizacyji przi warzyniu 😉

Wciepcie¹³ wszyjske składniki do jaki miski, wymiyszejcie i przełōżcie do wyłożōnyj papiōrym do pieczynioł kyksōwki (abo jaki inkszy małyj formy).

Ôstowcie to na godzinka, żeby nōm sie to trocha powiōnzało, a potyn wrojście na godzina do bratruły¹⁴ łozgrzōnyj na 180 stopni. Keby po godzinie niy bōło to fajnie przibrōnołcōne¹⁵, to wyciōngcie tyn chlyb ze formy i wrojście na 10-15 minut nazōd¹⁶ do bratruły, ale łozhajcujcie¹⁷ jōm tera na 200 stopni. Niyskorzi musi sie tyn chlyb dobrze ochōdzić¹⁸ i mogecie sie brać za krajanie- yno pamiyntejcie, co by tego niy krŏć na za małe sznity, bo moge sie trocha łozlatywać¹⁹… niy ma glutynu, kery by to fajnie trzimoł 😉

Smacznego 🙂