Biskitrola ze mascarpōne (Rolada biszkoptowa z mascarpone)

To je richtich¹ ajnfachowe², ale jak potyn pokrajecie to na talyrz i postawicie gojścōm³ do kafeju⁴, to to na zicher⁵ sie na to ciepnōm⁶ i jeszcze bydōm Wołs chwołlić⁷, jake to gryfne maszkyty⁸ żejście narychtowali.⁹

 

Co potrza?

4 jajca

4 łyżki mōnki tortowyj

4 łeżki cukru

1 płaskoł łeżeczka proszku do pieczynioł

500 g mascarpōne

krauzka¹⁰ kōnfitury abo dżymu*

*Joł żech bez lato, jak u Teściowyj bōło kans¹¹ borōwek hamerykańskich, wciep je na patelnia, odparowoł woda i gorke wloł do krauzy. Potyn żech go yno przewrōciōł do gōry dnym i dziynki tymu terołzki miołech wspōminki ze lata 😉 Niy dołwołech tam żołdnego¹² cukru! I nic sie niy zepsuło, a joł mōm terołzki same owoce.

Ôddzielcie biołka ôd żōłtkōw. Biołka ubijcie ze cukrym na sztywnoł piana, potyn wmiyszejcie tam pomału żōłtka i przesiōnoł mōnka ze proszkym do pieczynioł. Na sztyrogato¹³ forma dejcie papiōr do pieczynioł, wyłōżcie na to ciasto i wrojście na 20 minut do bratruły¹⁴ łozgrzōnyj na 170 stopni.

Jak tyn biszkopt baje upieczōny, to go przeciepcie na czysto uciyraczka¹⁵ i symnijcie¹⁶ papiōr do pieczynioł (niy opołrzcie¹⁷ sie przi tym). Niyskorzi¹⁸ zawińcie to w rola¹⁹ i dejcie tymu ochōdnōńć²⁰.

Mascarpōne wymiyszejcie ze kōnfiturōm abo dżymym, łozsmarujcie²¹ na ochōdzōnym biszkopcie, zawińcie, dejcie²² na chwila do lodōwki i mogecie szykować kafyj 😉 Smacznego 🙂