Ciasto baniowe- bezglutynowe (Ciasto dyniowe- bezglutenowe)

Terozki^¹ je coroz to wiyncyj ludzi, co im szkodzi glutyn- niy śmiōm^² jejś^³ pszynicy, żyta ani jyńczmiynia^⁴. A jak sie tak czowiek pomyśli, że te wszyske kołołcze, ciasta i kyjkse, co je robiōły⁵ nasze ōłmy,^⁶miały tyn glutyn, no to na takim fajerze^⁷ by sie te ludzie niy pojedli. Bez^⁸ to żech prziszoł tyż na to, co by sam wciepnōńć^⁹ jaki recept bezglutynowy, co by mi potyn moja jedna kōmratka^¹⁰ niy pedziała^¹¹,że niy ma sam dō^¹² ni receptōw^¹³ na maszkyty^¹⁴. Niy kołżdymu to baje^¹⁵ smakować, ale taki, co by kołżdymu dogodziōł, to sie nawet jeszcze niy urodziōł- rymowanki wyszły yno bez cufal^¹⁶ 😉

Co potrza?

50 dkg ôbranyj¹⁷ bani

1 szklōnka ôleju

1 szklōnka brōnołtnego^¹⁸ cukru

4 jajca

2 szklōnki mōnki^¹⁹ ze majsu (kukurydzy)

1,5 szklōnki mōnki gryczanyj (jak mogecie jejś glutyn, to zamiast tyj mōnki mogecie dać pszynny)

1 szklōnka mlyka

3 łeżeczki sody ôczyszczōnyj

ździebko^²⁰ soli

10 dkg pokrajanych^²¹ daktyli

10 dkg ôrzechōw

10 dkg kandyzowanyj skōrki ze apfylziny^²²

Joł żech sie kupiōł takoł małoł^²³ bania hakkaido- łona je mniyjszoł i takoł barzi pomarańczowoł- i wrajziōł^²⁴ żech jōm w całojści do bratruły^²⁵ ôzgrzōnyj na 200 stopni na 20 min. Potyn, jak już ochōdła^²⁶, to żech obroł z ni skōra (choć niyftorzi gołdajōm^²⁷, że z tyj zorty^²⁸ niy trza ji^²⁹ obiyrać), wyciepnōł ziorka^³⁰ ze środka i potar^³¹ żech jōm na tarle^³² na tych srogich^³³ dziōrkach. Potyn żech wloł^³⁴ tam ôlyj i żech to jeszcze posztamfowoł^³⁵. Jak to mołcie fertich³⁶, to dejcie ôrzechy na chwila na patelnia, żeby sie trocha uprażōły. Jajca ubijcie ze cukrym, potyn wsujcie tam mōnki, ôlyj, soda, mlyko i to fajnie wymiyszejcie. Ôzgrzyjcie piec na 180 stopni, a do ciasta dejcie jeszcze te bakalie i zajś wymiyszejcie. Narychtujcie sie wiynkszoł blacha, dejcie na nia papiōr do pieczynioł, wyłōżcie na niego ciasto i wrojście do bratruły na 45-60 min. Jak sie bydzie mocno brōnołcić, to wyciōngejcie pryndzyj, niech trocha ochōdnie i… smacznego 🙂