Gofry

Niy ma chyba za kans¹ bajtli², kere³ niy lubiōm⁴ gofrōw. A i ci barzi⁵ majerantni⁶, kej⁷ sie pojadōm na wywczasy⁸ i przelezōm⁹ kole budki ze goframi, to sie niyjednymu zawołży¹⁰ i kupi choby yno takego z pudecukrym. Ale czamu sie takich niy narychtować¹¹ w dōma? Takoł maszyna do robiynia gofrōw idzie kupić za 50 zł, a to tela, wiela sie we jakim kurorcie zapłaci za piyńć gofrōw. My z mojōm Babōm¹² to sie lubiymy niyrołz tak pomaszkycić i na mitag¹³– ku tym gofrōm ślagzana¹⁴, roztomajte¹⁵ owoce i całoł fōra¹⁶ kalorii 😉

Co potrza?

(ta ilość styknie nōm na ôjziym¹⁷ wiynkszych gofrōw):

3 jajca

1/3 ôzpuszczōnyj¹⁸ kostki masła (ale niy tyj niymieckyj 250 g, yno tyj cyganiōnyj polskyj 200 g)

2 szklōnki mōnki

1 szklōnka mlyka

3-4 łeżki cukru

ździebko¹⁹ soli

3 płaske łeżeczki proszku do pieczynioł

trocha ôleju do natłuszczynia gofrownicy

Jajca zmiksujcie ze cukrym, wciepcie²⁰ reszta składnikōw, wymiyszejcie i fertich²¹– nojlepi, jak te ciasto niy je za rzołdke²². Gofrownica posmarujcie ôlejym, dejcie²³ tam trocha tego ciasta- tak, żeby yno przikrōło ta dolnoł czyńść- i zawrzyjcie²⁴. Niyskorzi²⁵ trza wejrzeć²⁶, czy sie niy przibrōnołciōło²⁷ za kans i nojlepi ôbrōcić na drugoł strōna. Jak już bydzie prawie fertich, to otwōrzcie i niech sie tera chwila posuszy ze jednyj i drugyj strōny, to tyn gofer bydzie barzi chrupiōncy. Na tym robota sie kōńczy i zaczyno Wasza fantazja, co byjście chcieli sie tam na wiyrch wciepnōć. Ślagzana, roztomajte kryjmy, owoce, zōłzy²⁸… Smacznego 🙂