Gyszynk ze lasa (Leśny dar)

Mōm nadzieja, że żołdyn¹ z Wołs² niy wejźnie³ tego miana⁴ dosłownie i niy bydzie⁵ szukoł we lejsie⁶ pod krzokym⁷ takego kōnska maszkytōw. Licentia poetica moge sie trefić⁸ nawet we receptach⁹. Ze lasa niy bōły¹⁰ ani ôstrangi¹¹, ani jagody, kere¹² żech sam wciep¹³, ale za starego piyrwy¹⁴ to właśnie tam- a niy we zygrōdce¹⁵– szło je trefić¹⁶. To je ciasto bez pieczynia, a właśnie take recepty¹⁷ nojbarzi lubiymy, jak na dworze je hic¹⁸ i czowiek łajzi¹⁹ daleko ôd bratruły²⁰. Niy za słodke, fajnie chōdne²¹, ze fataminami²²… nic wiyncyj nōm nie trza²³.

Co potrza?

300 g jagodōw- joł żech doł²⁴ tych hamarykańskich

200 g ôstrangōw (niyftorzy gołdajōm²⁵ na nie tyż dziady)

500 g mascarpōne

5 łeżek żelatyny

4-5 łeżek cukru

400 g petitkōw abo jakiś inkszych kyjksōw²⁶

Narychtujcie²⁷ sie wiynkszoł²⁸ prostokōntnoł blacha i wyłōżcie jōm papiōrym do pieczynioł. Na spodek poukłołdejcie- jedyn przi drugim- kyjksy. Uwarzcie²⁹ szklōnka wody ze dwiyma łeżkami cukru i ôzpuśćcie³⁰ w ni³¹ dwie łeżki żelatyny. Jak woda leko ochōdnie³², wymiyszejcie jōm porzōndnie ze mascarpōne. Na poukłołdane kyjksy powciepujcie³³ jagody, zalyjcie to masōm ze mascarpōne i wrojście³⁴ do lodōwki, żeby trocha stynżało. Przetrzyjcie ôstrangi bez sitko- strasznie mie nerwujōm we deserech ichnie³⁵ pestki. To, co ôstanie na sitku (pestki i trocha soku), wrojście do jakego garca, nalyjcie tam 3 szklōnki wody, wciepcie 2 abo 3 łeżki cukru i uwołrzcie- niy bydymy przeca marnowali tego smaku. Jak sie uwarzi, to przecedźcie, wytrzajście³⁶ pestki, a do tego wywaru dejcie 3 łeżki żelatyny i wymiyszejcie. Niyskorzi wciepcie do tego jeszcze te przetarte ôstrangi. Wyciōngcie³⁷ blacha ze lodōwki i na połowie wyłōżcie kyjksy i na to wlyjcie galaretka ze ôstrangōw. Tera na połra godzin do lodōwki. Jak już fajnie stynżeje, wyciōngcie (nojlepi na drugi dziyń) te ciasto ze blachy i przetnijcie na poła³⁸. Na ta poła z kyjksami wciepcie poła ciasta bez kyjksōw na wiyrchu- nojlepi przetnijcie tyż tyn papiōr, ustołwcie jedna poła nad drugōm, symnijcie papiōr ze jednyj strōny, połōżcie jōm i jak bydziecie ściōngać reszta papiōru, to kładźcie wiyrchnioł warstwa na dolnoł. Niy je to ajnfachowe³⁹, ale potyn mōmy take fajne warstwowe ciasto. Smacznego 🙂