Piernik ze kartołflōma (Piernik z ziemniakami)

Już ôd¹ listopada rychtuja² roztomajte³ wersje tego piernika i musza pedzieć⁴, że sie werciōło⁵. Podstawowy recept⁶ mōm ôd ciotki Eldzy- już żech jōm sam spōminoł⁷, przi pieczyniu ciasta ze cukiniōm. Połra⁸ składnikōw żech wymiyniōł, niyftorych dołech mani i do tego jeszcze 2 łeżeczki ziela angelskigo. Anglikanery gołdajōm na nie allspice, co po naszymu by bōło: wszyjske prziprawy i bez to żech sie pomyśloł, że już wiyncyj tymu piernikowi niy trza. A że niyftorzi gołdajōm na ziele angelske tyż jamajski pieprz, to idzie pedzieć, że bańdzie to pfeferkuchyn⁹ ze kartołflōma.

Co potrza?

0,5 kg uwarzōnych¹⁰ i przepresowanych¹¹ kartołfli (nojlepi je przepresować, jak sōm gorke¹²)

0,5 kg mōnki pszynny

25 dkg cukru

0,5 kg miodu

kostka masła (rozpuszczōnoł)

5 jajec

5 dkg kakao

1 dkg amōniaku (jak byjście go nikaj niy mogli znojś, to mogecie dać 2 łeżeczki sody ôczyszczōnyj, choć ze amōniakym je fajniyjsze)

2 łeżki mielōnego ziela angelskigo

10 dkg rodzynkōw

10 dkg płatkōw ze mandli

10 dkg kandyzōwanyj skōrki ze apfylziny¹³

trocha mlyka

Polywa:

5 dkg masła

5 łeżek cukru

3 łeżki mlyka

1 łeżka kakao

Nojprzōd¹⁴ ubijcie jajca ze cukrym, potyn wciepcie¹⁵ do tego reszta składnikōw i fajnie wymiyszejcie. Pamiyntejcie, żeby amōniak pryndzyj rozrobić we mlyku (styknie ćwierć szklōnki) i żeby tego niy wōniać¹⁶, bo śmierdzi jak pierōn. Ale już we pierniku tego smrodu niy bydzie- niy bōjcie sie 😉 Jak już to wszyjsko rozmiyszołcie¹⁷, to wlyjcie tyn piernik na wiynkszoł blacha wyłożōnoł papiōrym do pieczynia i wrojście do bratruły¹⁸ rozgrzōnyj na 180 stopni. Niech sie to tam posiedzi tak ze 40-50 minut- musicie dać pozōr¹⁹, żeby sie niy przipołlōło²⁰. Bez tyn czas mogecie sie zrobić polywa. Wszyjske ôd ni²¹ składniki wciepcie do gorka, dejcie na piec i niech sie to na małym ôgniu trocha powarzi.

Jak już tyn pfeferkuch bydzie fertich, to go wyciōngcie²², posmarujcie polywōm, niech trocha sie ochōdzi²³ i… biercie sie za niego. Smacznego 🙂