Syrnik koko-wiśnia (Sernik kokosowo- wiśniowy)

Piyrsze¹ skojarzynie ze koko to je kura i po prołwdzie² tyn syrnik tyż ze kurōma³ moł⁴ co wspōlnego, bo dołwo⁵ sie rajn⁶ ôziym⁷ jajec. Te inksze⁸ znaczynie koko- dzisiaj może by my to napisali coco- wiedzie nołs do kōłkōsraszpli⁹. Sōm¹⁰ ludzie co ich niy ciyrpiōm, sōm take co sie zarozki¹¹ na nie ciepnōm¹² i sōm take jak moja Kobiyta, kero¹³ kōłkōsraszpli niy je, ale mlyko kokosowe i te biołe wybrane prosto ze ôtwartego ôrzecha to już ja… ludzie sōm roztomajte¹⁴ 😉

Joł żech tyn syrnik robiōł ze wiśniami kandyzowanymi, ale jak tera na zygrōdce¹⁵ sōm take fajne świyże, to mogymy sie brać za pestkowanie i pieczynie.

Co potrza?

Spodek¹⁶:

1,5 szklōnki mōnki pszynny

1 szklōnka kōłkōsraszpli

2 żōłtka

1 łeżeczka proszku do pieczynia

łeżka śmiytōnki¹⁷

15 dkg masła

0,5 szklōnki cukru

Syrnik:

1 kg syra (joł żech doł taki presowany, ale mogecie dać i taki ze wiaderka- chyba, że wolicie ze ajmra¹⁸ 😉 )

1 szklōnka cukru

0,5 szklōnki ôleju

2 szklōnki mlyka

1 kisiel wiśniowy

4 żōłtka

2 jajca

2 paczki kandyzowanych wiśni abo ze 20 dkg świyżych (wypestkowanych)

ździebko¹⁹ chili

Wiyrch:

6 biōłek

1 szklōnka cukru

ździebko soli

1 szklōnka kōłkōsraszpli

Bierymy sie za spodek: wszyjske składniki wciepcie²⁰ do jaki miski i fajnie wyrōbcie. Na blacha (sztyrogato²¹) dejcie²² papiōr do pieczynioł i na niego wyłōżcie rozrobiōne ciasto- przi rantach²³ mogecie²⁴ je dać trocha wyżyj.

Tera w kolyjce²⁵ je syrnik. Jajca trza²⁶ utrzyć ze cukrym (yno niy smōlcie²⁷ sie z tym za kans²⁸, bo przeca²⁹ tyn cuker sie rozpuści niyskorzyj³⁰ we mlyku), potyn wlyjcie³¹ tam ôlyj, syr, chili, mlyko ze rozpuszczōnym kisielym i wszyjsko cuzamyn³² wymiyszejcie (joł to robia mikserym). Na kōniec dociepcie tam wiśnie i mogecie to wymiyszać warzechōm. Bratruła³³ nagrzyjcie na 180 stopni, syrnik wylyjcie na blacha i wrojście rajn na 50 minut- dejcie pozōr³⁴, bo niyftore³⁵ piece lubiōm przipołlać³⁶.

Bez tyn czas ubijcie biōłka ze cukrym na sztywnoł piana (dejcie dō nich tyż ździebko soli), na kōniec wciepcie rajn kōłkōsraszple. Jak syrnik bydzie upieczōny, to wyłōżcie ta piana na wiyrch i wrojście do pieca na 15 minut.

Jak już piana sie fajnie przibrōnołci³⁷, to wyciōngcie tyn nasz syrnik, ochōdźcie³⁸ i… smacznego 🙂