Szokoladowe kulki ze prosym (Trufle czekoladowe)

Nojbarzi¹ lubia take maszkyty², co sie gibko³ rychtuje⁴ i te szokoladowe kulki sōm⁵– idzie pedzieć⁶– idealne. Kupiōłech sie jakiś czołs⁷ tymu espandowane proso (teke dmuchane). Proso uprawiali nasze pra-praōłpy⁸ i ōłmy, potyn ô⁹ nim zapōmnieli, a ôno moł kans¹⁰ fetaminōw¹¹, biōłka i zdrowego fetu¹². Do tego jeszcze dołech¹³ mielōne ôrzechy laskowe, co to i fajnie smakujōm, i majōm kans fetaminy E- a jōm mianujōm¹⁴ niyrołz fetaminōm młodojści i płōdności… Do tego jeszcze szokolada¹⁵, co to je ôd wiekōw znanym afrodyzjakym… dejcie sie pozōr¹⁶ 😉

Co potrza?

1 syrek maskarpōne (250 g)

1 gorzkoł szokolada

0,5 szklōnki ôrzechōw laskowych

1 łeżka rumu

50 g prosa espandowanego (mogecie tyż dać espandowany ryż, amarantus abo i co inkszego)

Kebyjście musieli mieć to słodsze, to dejcie¹⁷ jeszcze łeżka pudecukru¹⁸– joł niy doł¹⁹, bo i tak za chwila trza sie bydzie wziōńć za te 3 kilo, co żech nazbiyroł na mrozy 😉

Ôzpuśćcie²⁰ szokolada – nojlepi we misce nad gorkym wrzōncyj wody- i pomiyszejcie jōm ze maskarpōne, ôrzechōma i rumym. Wsujcie proso na jaki talyrz, wejście łeżka masy i wciepcie²¹ do tego talyrza, ôbsujcie prosym, uformujcie kulka i fertich²². Niyskorzi dejcie to do lodōwki, żeby trocha stwardło i- smacznego 🙂