Szpajza ze mango (Deser śląski- wersja eksperymentalna z mango)

Jak idzie¹ zrobić szpajza ze pozimkōma,² to czamu³ niy zrobić sie i taki⁴ barzi⁵ oriyntalnyj ze mango. Pomysłōw na roztomajte⁶ szpajzy mōm⁷ jeszcze trocha i to może mi z tego wyjdzie tako całoł seria. Pamiyntejcie, że nojważniysze jest sam⁸ te mango, niy moge⁹ być twarde, ale fajnie miynke i soczyste. Tyn deser je taki odświyżajōncy, niy za słodki i jak żech go testowoł na gościu, to niy dojś,¹⁰ że przeżōł, to jeszcze pedzioł,¹¹ że je bardzo dobry 🙂

Co potrza?

1 sroge¹² i dojrzałe mango
400 ml śmiytōnki ( 36 % )
2 łeżki cukru pudru
3 łyżeczki żylantyny
połra¹³ łeżek wody

Do posypania na gōra:
płatki biołyj¹⁴ szokolady, abo kōłkōsraszple,¹⁵ abo płatki migdałów, abo jeszcze jake inksze rzeczy, co to bydōm fajnie wyglōndać na wiyrchu.¹⁶

Mango łobiercie,¹⁷ pokrejcie¹⁸ na byle jake kōnski¹⁹ i dejcie²⁰ je do jaki miski, abo blyndera. Ta pestka, co je we środku, mogecie wyciepnōńć.²¹ Mango zmiksujcie, dodejcie do niego rozpuszczōno we wrzōntku żylantyna i wejście²² sie za śmiytōnka. Ubijcie jōm, a pod kōniec dejcie cuker puder. Tera nastołwcie²³ sie mikser na mańszo²⁴ pryndkość i pomału²⁵ dodołwejcie sie dō ni te zmiksowane mango. Przelyjcie ta szpajza do jaki fajny miski, na wiyrchu posypcie szokoladōm abo i jakim inkszym łōnym do posypowania, dejcie do lodōwki, poczekejcie, aże stwardnie i …smacznego 🙂