Gibki mitag ze jarmużym (Szybki obiad z jarmużem)

Nirozki trza zrobić mitag,^¹ a czasu mōmy^² małowiela.^³ Nojlepi wtedy powciepować^⁴ połra^⁵ rzeczy na patelnia abo do jakego garca i jedzynie mōmy zarozki^⁶ fertich.^⁷ Chciołech tak cojsik zrobić ze wōsztym^⁸– bo to najmani roboty- i jak żech już go mioł,^⁹ to zauważōłech we sklepie jarmuż. Tak mie zainspirowoł, że żech yno jeszcze chyciōł tam pieczarki i polecioł żech do dōm warzić. Jarmuż bōł bez lata zapōmniany, ale za starego piyrwy^¹⁰ szło go znojś^¹¹ nawet na zygrōdce^¹² u moji Ōłmy^¹³ Any.^¹⁴

Co potrza?

3 wōszty- niy za sroge^¹⁵

1 cebula

1-2 zōmbki czosku^¹⁶

20 dkg pieczarkōw

10-15 dkg jarmużu

sōl i pieprz

trocha masła klarowanego

kapka oliwy

oregano- jedna łyżeczka na pewno 😉

Na patelni na maśle klarowanym podpiyczcie pokrōny^¹⁷ wōszt. Jak już sie baje^¹⁸ brōnołciōł^¹⁹, to dejcie tam pokrōno cebula i wyciśniynty czosnek. Jak mołcie srogo patelnia, to jeszcze do tego tu mogecie^²⁰ dociepnōńć pieczarki, a jak niy, to wōszt ze cebulōm przeciepcie do wiynkszego gorka, a na patelni na oliwie (na małym łogniu^²¹) leko^²² podpiyczcie same pieczarki. Potyn wciepcie je razym ze jarmużym do gorka, dejcie tam trocha soli, pieprzu,oregano i niech sie to trocha podusi. Jak już tyn jarmuż zmiynknie (niy potrzebuje wiyncyj niż 5 min.), to dosmakujcie^²³ sie to jeszcze, przigotujcie sie talyrze i … smacznego 🙂