Curry ze kury (Nie ma co tłumaczyć ;) )

Te Europejczyki we Indiach na wszyske gynste^¹ zōłzy^² gołdali^³ curry- bo sami Hindusi kołżdo^⁴ mianowali^⁵ inaczyj. To trocha tak, jakby na wszysko, czym sie hajcuje^⁶ we piecy, gołdać wyngel^⁷ 😉 Anglikōm- bo ich tam przeca bōło nojwiyncyj- tak te prziprawy zasmakowały, że sie chcieli je zawiyś^⁸ do dōm i tak sie narodziōła prziprawa curry, co to jōm idzie kupić u nos^⁹ we sklepie. Ze ftoryj czyńści Indii je tyn recept, co go sam na dole mołcie, to ciynżko pedzieć, a jeszcze ciynżyj by bōło znojś łod niego hindusko nazwa. Jedno je pewne: smakuje jak we Indiach, a wiym, jak tam te roztomajte^¹⁰ jołdła^¹¹ smakujōm, bo żech sie już tam 2 razy smykoł^¹² 😉

Co potrza?

2 piersi ze kury abo kokota^¹³
1 cebula
3 zōmbki czosku
1 krauzka kōncyntratu ze tōmatōw (200g)^¹⁴
2-3 łeżki^¹⁵ klarowanego masła (we Indiach gołdajōm na nie masło ghi)
kapka^¹⁶ oliwy
0,5 szklônki wrzōntku
4 łeżki mlyka skōndynsowanego (abo ze 8 normalnego- niy musi być świyżo dojōne, moge być ze sklepu 😉 )

Prziprawy:
2 łyżeczki garam masala *
1 łyżeczka zmielōnych goździkōw
1 łyżeczka cynamōnu
1 łyżeczka mielōnych nasiōn kolyndry
1 łyżeczka kminu rzymskego
1 łyżeczka kurkumy
trocha pieprzu i chili
Do tego curry Hindusi niy dołwajōm soli, a je tam tyla inkszych arōmatōw, że nawet mi jyj niy brakuje. Na końcu mogecie sie tego dania sprōbować i keby Wōłs dali ciōngło do tego biołego proszku, to mogecie go ździebko¹⁷ dać.

Na patelnia dejcie^¹⁸ masło klarowane i zeszklijcie na nim pokrōno^¹⁹ cebula. Dociepcie^²⁰ wyciśniynty czosnek i prziprawy- kapnijcie do tego jeszcze trocha oliwy, żeby niy bōło za suche. Jak już prziprawy napocznōm^²¹ fajnie wōniać,^²² wrołźcie^²³ do tego tyż tego pokrōnego kurczaka i niech sie łon z tymi prziprawōma przegryzie. Dejcie pozōr,^²⁴ żeby sie Wōm to niy przipołlōło.^²⁵ Potyn wciepcie kōncyntrat, dolyjcie wrzōntek, pomiyszejcie, przikryjcie i niech sie to chwila na małym łogniu podusi- 10-15 min. Na koniec wlyjcie^²⁶ mlyko, wymiyszejcie i fertich.
Tyn placek na zdjyńciu to je czapati- smakuje i wyglōndo podobnie jak pszynne tortille. Idzie^²⁷ je kupić we sklepie oriyntalnym, ale take curry mogecie sie zjejś tyż ze ryżym abo jakōm dobrōm bōłkōm. Smacznego 🙂

*Garam masala to we jynzyku hindi znaczy gorke^²⁸ prziprawy i tak sie je tyż rychtuje-^²⁹ na gorko i bez to łone po tyn tak dobrze czowieka rozgrzywajōm. Takoł miyszanka mogecie sie narychtować^³⁰ sami. Zrōbcie sie ji^³¹ wiyncyj, a bajecie^³² mieć jōm^³³ na dugo.
Na patelnia wciepcie:
6 łeżek pieprzu, 5 łeżek kminu rzymskego, 2 łeżki cynamōnu, 1,5 łeżki goździkōw, 2,5 łeżki kardamonu, 6 łeżek nasiōn kolyndry, 2 łeżki pokruszōnych bobkowych^³⁴ liści i łyżeczka zmielōnyj gałki muszkatołowyj. Podpiyczcie ze 30 sekund na średnim łogniu i łodstołwcie do ochōdzynia.^³⁵ Tera zmielcie i zawrzyjcie^³⁶ w jaki krauzce.^³⁷ Niech Wōm dugo pomołgo^³⁸ we warzyniu 🙂