Karminadle cyganiōne (Klopsiki z grochu)

Pōnojś to niy je wcale take zdrowe, żeby durś¹ jejś miyso i bez to (choby yno we piōntek) idzie sie wymyślić tyż co inkszego. Po zimie jeszcze możno Wōm łostało kajś² w jakim szranczku³ trocha grochu, to sie mogecie zrobić take cyganiōne karminadle. Yno sie dejcie pozōr,⁴ jak we piōntek bajecie⁵ wołać Wasze bajtle⁶ na łobiołd, bo jak kero⁷ sōmsiadka baje słyszeć, że mołcie⁸ karminadle, to baje w sztandzie⁹ jeszcze iś na skarga do farorza¹⁰ 😉

Co potrza?

25 dkg łuskanego grochu

10 dkg potartego żōłtego syra

1 jajco

1 cebula

zōmbek czosku

pó¹¹ łeżeczki majeranku

sōl i pieprz

tarto bōłka

łolyj do pieczynia¹²

Groch we jakim gorku zalyjcie wrzōntkym, a za 15 min wylyjcie ta woda i nalyjcie świyżyj. Tera niech sie pomoczy- jak mołcie czas, to moge i bez noc, ale tyn łuskany przeca¹³ niy je taki twardy i nawet jak niy mołcie za kans czasu na moczynie, to nic sie niy stanie, yno trza tyn groch baje trocha dużi powarzić¹⁴. Niyftorzi gołdajōm, że groch moł sie warzic we wodzie, we jaki sie moczōł, ale joł tam wola sie jōm wymiynić i być zicher¹⁵, że mie nie bydzie potyn bez pó dnia beczkować¹⁶.

Tera prziszoł czas na warzynie. Taki groch je twardy i trza liczyć aby 40 minut, żeby bōł miynki. Pamiyntejcie , żeby go niy solić, a jak we gorku bydōm sie robiōły szuminy, to je pozbiyrejcie i wyciepcie. Jak już groch bydzie miynki, to mogecie go łodcedzić i posztamfować¹⁷. Jak trocha ochōdnie¹⁸, to wciepcie tam pokrōno cebula, przeciśniynty czosnek, jajco, syr, majeranek, sōl i pieprz i wszysko fajnie wymiyszejcie. Na jakim talyrzu wysypcie sie tartoł bōłka, rynkami sie uformujcie karminadla (abo karbinadla, bo tak tyż niyftorzi gołdajōm) i łobtoczcie go we tartyj bōłce. Na patelnia sie wlyjcie trocha łoleju i piyczcie te nasze cyganiōne karminadle, aż bydōm fajnie złote. Do nich sie mogecie uwarzić tyż i kartołfli, zjejś jako bōłka, abo i zezryć je same 😉 Smacznego 🙂