KRUPNIOK RAJZUJE. Czyńść 2: Krupniok lołce po Indiach (Curry z kaszanką)

Tyn krupniok to już dołwno¹ nikaj² niy lotoł³ i trza to nadrobić. Joł⁴ po Indiach już żech sie smykoł⁵ dwa razy, a tyn borołk⁶ krupniok yno na tym grillu siedzi. Jak eksperymyntować, to na całego, a jak Indie, to curry [czytej: kary]. Kebyście⁷ się boli aż takich eksparymyntōw, to Wōm mogą pedzieć we tajymnicy, że jak zamiast krupnioka wciepniecie kurczaka, to bajecie mieć curry ze kury.

Co potrza?

5 małych krupniokōw (sebleczōnych⁸ ze skōry)
1 cebula
3 zōmbki czosku
2 krauzki kōncyntratu z tōmatōw⁹
3-4 łeżki¹⁰ klarowanego masła
kapka¹¹ oliwy
0,5 szklônki wrzōntku
4 łeżki mlyka skōndynsowanego (abo ze 8 normalnego- niy musi być świyżo dojōne, moge być ze sklepu 😉 )

Prziprawy:
2 łyżeczki garam masala *
1 łyżeczka zmielōnych goździkōw
1 łyżeczka cynamōnu
1 łyżeczka mielōnych nasiōn kolyndry
1 łyżeczka kminu rzymskego
1 łyżeczka kurkumy
trocha pieprzu i chili

Na patelnia dejcie¹² łeżka abo dwie masła i zeszklijcie pokrōno¹³ cebula. Dociepcie¹⁴ wyciśniynty czosnek i prziprawy- kapnijcie do tego jeszcze trocha oliwy. Jak już prziprawy napocznōm¹⁵ fajnie wōniać,¹⁶ przeciepcie¹⁷ to do wiynkszego gorka,¹⁸ a na patelnia wciepcie 2 łeżki masła i pokrōne krupnioki. Jak sie trocha podpiekōm, to rajn¹⁹ ze nimi do garca. Tera bierymy²⁰ sie za gornek. Postołwcie²¹ go na piec, wciepcie kōncyntrat i fajnie wymiyszejcie. Dolyjcie wrzōntek, przikryjcie i niech sie chwila podusi. Na koniec wlyjcie²² mlyko, wymiyszejcie i fertich.
Tyn jasny placek na zdjyńciu to je pappadam. Idzie²³ je kupić we sklepie oriyntalnym. Wciepuje sie je na chwila na gorki²⁴ łolyj i wychodzōm take sroge chrupiōnce czipsy. Te curry mogecie sie zjejś tyż z jakōm dobrōm bōłkōm. Smacznego 🙂

*Takoł garam masala mogecie sie narychtować²⁵ sami. Zrōbcie sie ji²⁶ wiyncyj, a bajecie²⁷ mieć jōm²⁸ na dugo.
Na patelnia wciepcie:
6 łeżek pieprzu, 5 łeżek kminu rzymskego, 2 łeżki cynamōnu, 1,5 łeżki goździkōw, 2,5 łeżki kardamonu, 6 łeżek nasiōn kolyndry, 2 łeżki pokruszōnych bobkowych²⁹ liści i   łyżeczka zmielōnyj gałki muszkatołowyj. Podpiyczcie ze 30 sekund na średnim łogniu i łodstołwcie do ochōdzynia.³⁰ Tera zmielcie i zawrzyjcie³¹ w jaki krauzce.³² Niech Wōm dugo pomołgo³³ we warzyniu 🙂