KRUPNIOK RAJZUJE. Czyńść 3.: Krupniociosa (Podróże z kaszanką: Pizza z kaszanką)

Niy dojś¹, że żech we łostatnim miesiōncu eksperymyntowoł ze pizzōm w dōma, to żech jeszcze pojechoł do Włoch, coby tam te roztomajte pizze pokosztować. I musza Wōm pedzieć, że niby składniki majōm podobne, ale w smaku to niyrołz jedna kole drugi sie niy moge stanōńć… to trocha jak ze babōma, na jedne niy idzie patrzeć, a przed inkszymi aże sie chopom uginajōm kolana. Krupniociosa  [czyt. Krupnioczioza] wyszła richtig dobrze- a gołdali² mi to i nawet cudze³ ludzie, co to bez cufal⁴ trefiyli na kostprōba⁵. 

Co potrza?

Ciasto na jedna łokrōngłoł pizza:
1 szklōnka mōnki pszynny ( od 405 do 600- numer na pakiecie)
1/3 szklōnki mlyka
1 dkg drożdży
trocha soli
pó⁶ łeżeczki cukru
2 łeżki oliwy

Wiyrch⁷:
50-80 ml gynstyj śmiytōnki
1 zōmbek czosku
połra gałōnzek natki pietruszki
2 mańsze krupnioki
pó boreju⁸ 

10 dkg wyndzonki⁹
10-15 dkg żōłtego syra
pó łeżeczki orygano¹⁰

 

Mōnka przesujcie¹¹ do jaki miski- mogecie jōm tyż przesiołć. Na pośrodku zrōbcie dziura i wlyjcie dō ni letnie mlyko, dejcie cuker i pokruszcie drożdże. Tera odstołwcie to na 10-15 min., coby te drożdże zaczły robić. Joł włōnczōł na chwila piekarnik  (bratruła)  na 50 stopni i jak sie leko rozgrzoł, to dołem tam ta miska, bo tam lepi te ciasto rośnie.
Niyskorzi dejcie do tyj miski trocha soli, 2 łeżki oliwy i wyrōbcie jednolite ciasto- keby sie za kans¹² klejōło, to mogecie jeszcze dosuć¹³ trocha mōnki.  Tera zajś trza je łodstawić i to tak na aby 40 min.
Jak już nōm fajnie urosło, to sie wejście¹⁴ nudelkula, posypcie na stolnica abo blat trocha mōnki i rozkulejcie sie ta pizza na łokrōngło. Tera idzie sie domyśleć, że zajś jōm na chwila dōmy we ciepłe miejsce, a potyn już yno wciepowanie na wiyrch dobroci¹⁵.
Bez tyn czas jak łona nom tam rojśnie, mogecie sie przigotować składniki na wiyrch. Do śmiytōnki wyciście 1 zōmbek czosku, pokrejcie trocha natki, dejcie soli i pieprzu. Boryj pokrejcie na take półtalarki abo talarki, wyndzonka we kostka, a krupnioka seblyczcie¹⁶ ze skōry i pokrejcie na 1 cm szajby¹⁷. Syr zetrzyjcie, a piec rozgrzyjcie sie na 225-230 stopni.
Jak już spodek trocha podrośnie, to rozsmarujcie na wiyrchu śmiytōnka ze dodatkami, fajnie po cołojści porozkłołdejcie szajby krupnioka i posujcie to noprzōd¹⁸ pokrōnym borejym, a na kōniec syrym.
We pizzeriach to łoni mojōm piece rozgrzōne na ponad 300 stopni i bez to te pizze siedzōm tam yno ze 7 minut, przi naszyj tymperaturze musi driny¹⁹ posiedzieć ze jake 15-20 minut, ale tak po prołwdzie²⁰ to trza patrzeć, kedy sie fajnie przibrōnołci²¹ tyn syr.
Jak już jōm wyciōngniecie, to posujcie jōm po wiyrchu trocha orygano (mogecie jeszcze dać tyż troszka zielōnyj pietruszki) i… smacznego  🙂