Tuste ze jabkym i śliwkōm (Smalec z jabłkiem i śliwką)

Niyrozki dostana¹– a to łod sōmsiada² od moji Mutry, a to łod jyj kōmratki³– kōnsek⁴ szpeku⁵, ale to niy byle jaki szpek, bo łod świnie, co to bōła chowano⁶ do siebie, a niy na sprzedyj i bez⁷ to dostowała ciyngiym⁸ lepszy futer.⁹ Moja Muter to sie tam z tym niy smoli- zeskwarzi¹⁰, do krauzy¹¹ i fertich¹², ale joł żech sie tak pomyśloł, że jak już wieza¹³ takoł daleko drōga we tym swojim kofrze¹⁴ ta świnia, to należy jyj sie już co lepszego 😉

Co potrza?

20 dkg szpeku

1 jabko- niy za miynke

3-4 suszōne śliwki

sōl, pieprz (korzynie)

pó¹⁵ łeżeczki majeranku

pó łeżeczki tymianku

Tego szpeku mogecie dać tyż wiyncyj, ale joł do tych eksperymyntōw niy chcioł zarozki dołwać pó kilo, bo jakby mie to potyn niy smakowało, to bych sie z tym musioł dużyj trołpić.¹⁶ I jak na te 20 dkg szpeku to jest tyż dojś dużo jabka, ale to bez to, żeby te tuste¹⁷ niy bōło za tuste.

Pokrejcie¹⁸ sie tyn szpek na drobno kosteczka i wciepcie na patelnia abo do jakego garca i niech sie pomału skwarzi. Te śliwki zalyjcie na chwila wrzōncōm wodōm i potyn pokrejcie razym ze jabkym. Jak już we garcu bydōm take fajne brōnołtne szpyrki¹⁹, symnijcie²⁰ go ze łognia, wciepcie tam pokrōne jabko, śliwki, prziprawy, fajnie wymiyszejcie, przelyjcie do jakego gorczka abo krauzy i fertich. Jak tyn fet już ochōdnie,²¹ to nic yno brać sznita²² chleba, smarować i smacznego 🙂