Modrŏ kapusta/Blaukraut (Niebieska kapusta zasmażana)

Tego dania to chyba niy trza żołdnymu przedstawiać 😉

Co potrza?

pó gōwki modryj kapusty (chyba, że mołcie jedna małŏ)

sōl i pieprz

10-20 dkg wyndzōnki¹

łeżeczka cukru

połra łeżek ôctu

połra łoztrzaskanych we mojździerzu kulek ziela angelskego

połra liści bobkowych²

1-2 starte jabłka

1 cebula

niypołnŏ szklōnka wody

łeżka masła abo ździebko oliwy

Pokrōnżejcie³ kapusta, wciepcie⁴ do gorka, wlyjcie woda i warzcie⁵ we ŏtwartym gorku- idzie ô to, żeby woda nōm bez tyn czas ôdparowała i niy trza ji bōło ôdcedzać. Do gorka dociepcie ziele angelske, liście bobkowe, sōl, pieprz, cukier, jabko, wlyjcie trocha ôctu i do smaku mogecie tyż dać masła abo oliwy (abo jedne i druge). Niech sie to tak pomału warzi- jak sie Wōm spōmni, to mogecie ta kapusta tyż połra razy pomiyszać (tak ze pó godziny na wszyjsko zyńdzie⁶).

Pokrejcie wyndzōnka i przypiyczcie na patelni, pod kōniec dociepcie do niyj pokrōnŏ cebula. Kedy kapusta bydzie już miynkŏ, dejcie dō ni przypieczonŏ wyndzōnka ze cebulōm. Dosmakujcie ôctem, solōm, pieprzym i przez chwila jeszcze powarzcie. Za połra minut mogecie sie za nia brać. Smacznego 🙂