Smażōnka (Jajecznica)

Pomyśloł żech sie, że trza by sam wciepnōńć¹ tyż jaki recept² do tych, co to majōm dwie lewe rynce do warzynia.³ Coś ajnfachowego,⁴ a przi tym- jeszcze jak sie moł⁵ jajca łod szczyńśliwych kurōw- tak dobrego, że niyjedna baba abo chop bydzie chcioł łostać⁶ na taki frisztik.⁷ Dać sam idzie⁸ i szinka, i wōszt,⁹ i wyndzōnka¹⁰ abo, jak to za starego piyrwy¹¹ bōło, kōnsek szpeku.¹² Na kōniec trocha sznitlochu¹³ i…. prrr…, to tera łod poczôntku.

Co potrza?
jajca (umyte)- wszysko zależy łod tego, wiela¹⁴ Wołs bańdzie¹⁵ do tego jedzynia, ale idzie pedzieć,¹⁶ że tak 3 jajca na łebka
kōnsek szinki abo wyndzonki, abo szpeku
trocha sznitlochu
sōl
trocha masła klarowanego

Joł lubia sie zrobić nawet same jajca, bo jak prziwieza sie take łod kurōw, co to je chowie¹⁷ moja Muter,¹⁸ to łōne sōm¹⁹ aże słodke. Minus je taki, że jak czowiek łajzi²⁰ po placu, to trza dać pozōr,²¹ kaj sie depce.²²
Jak idzie o smażōnka, to niy lubia, jak biōłko je niy do końca zetniynte, ale lubia lejōnce sie żōłtka i bez to noprzōd²³ oddzielōm żōłtka łod biōłek. Na łobrołzku²⁴ je smażōnka ze wyndzōnkōm i to łona, ta wyndzōnka, idzie na patelnia za piyrszo. Jak już sie fajnie podpiecze, to wciepuja dō ni biōłka- soli nirozki wcale niy trza dołwać,²⁵ bo wyndzōnka je słōnoł. Jak już biōłka sōm porzōndnie upieczōne, to wciepuja żōłtka. Tera już nawet idzie wyłōnczyć łogyń pod patelniōm, żeby sie żōłtka za kans²⁶ niy zetły, trocha to pomiyszać, posuć pokrōnym sznitlochym i brać sie za jedzynie. Smacznego 🙂