Szałołt ze melōnym (Sałatka z melonem)

Mōm¹ nadzieja, że sie Marcin Melon- tyn ôd² „Kōmisorza Hanusika”- niy baje³ bōł⁴, że ftojś⁵ go pokraje⁶ do szałołtu, ale jakbyjście sie chcieli, to ta ôd niego ksiōnżka mogecie⁷ sie poczytać abo posuchać do jedzynia (sōm żech nagroł piyrszy tōm)… Bajecie mieć melōna do kwadratu 😉

Szałołt to jedne, ale ta zōłza⁸ ze awokado to wyszła takoł dobroł, że trza bydzie jōm tyż wyprōbować przi inkszych⁹ receptach¹⁰.

Co potrza?

ćwierć melōna (joł¹¹ żech doł żōłtego)

pó¹² gowki szałołtu masłowego abo pó paczki miszōngu¹³ szałołtōw

2 gorści¹⁴ roszpōnki

1 gruszka

2 jabka

3 tōmaty¹⁵

Zōłza ze awokado:

jedne awokado

sok ze poły citrōłny¹⁶

1 łeżka ôctu winnego

8 łeżek oleju (rzepakowy abo słōnecznikowy)

4 łeżki oliwy

sōl i pieprz

Melōna ôbiercie¹⁷ ze skōry i pokrejcie¹⁸ we kostka. Gruszka, jabka i tōmaty niech idōm¹⁹ tōm²⁰ samōm drōgōm (choć tōmatōw żech ze skōry niy ôbiyroł- ja, ja, je żech zgniōły²¹ 😉 ). Do miski wciepcie²² potargane na mańsze²³ kōnski²⁴ liście szałołtu i fajnie je wymiyszejcie ze inkszymi składnikami.

Tera sie bierymy ²⁵za zōłza. Awokado, jak je fajnie dojrzałe, to prawie same ôdyńdzie²⁶ Wōm ôd skōry. Wciepcie je ze resztōm składnikōw do miski i zmiksujcie. Terozki czekoł Wołs już yno²⁷ nałożynie szałołtu na talyrz, polōnie²⁸ zōłzōm i… smacznego 🙂