Szałołt ze śledziōma (Sałatka śledziowa)

Taki szałołt to sie moge przidać i na Ostatki jako tzw. zagrycha, i na Popielec jako danie postne. Jak jeszcze by tak pomyśleć ło tym, że zeler naciowy i jabko niy majōm za kans¹ kalorii, to mōmy danie richtig² postne. A keby tak zmiynić majōnez na jogurt i wszysko drobno pokrajać, to mołcie hekele³ fitness. Joł tam wola jednak majōnez, bo łon nōm lepi połōnczy te składniki. Ślydź je słony, jabko słodke, zeler leko ostrzyjszy, łogōrek kwaśny, a wszystko razym… już mi we brzuchu burczy 😉

Co potrza?

5 płatōw matiasa (idzie to tyż zrobić ze normalnym śledziym solōnym, yno, że bajecie⁴ mieli trocha wiyncyj roboty ze czyszczyniym)
5 łodygōw zelera naciowego
1-2 jabka
3-5 łogōrkōw kiszōnych  (zależy jake sōm sroge,⁵ joł żech doł 5, bo miołech take małe pyrtki)
trocha pokrōnego sznitlochu⁶
pieprz
przed podaniym 2-3 łeżki majōnezu

Matiasy to sōm heringi⁷ (a niyftorzi na nie gołdajōm tyż harynki), co to sie je chyto⁸ we maju jeszcze przed piyrszym zeksym.⁹ Idzie pedzieć, że to sōm same dziywice- a że łone sōm nojlepsze, to wiedzioł nawet Drakula, co to sie niby na śledziowe dziywice niy ciepoł, ale na te ludzke to już ja 😉

Pamiyntejcie, żeby je noprzōd¹⁰ porzōndnie wymoczyć- te matiasy, a niy dziewice- i połra razy zmiynić woda. Jak już śledzie bydōm fertich, to potyn trza yno wszysko fajnie pokrajać, wciepnōńć trocha pieprzu, nim bajecie jejś trocha majōnezu i szlus.¹¹

Niy ma sam żołdnego wydziwiania, a jak sie już chycicie za tyn szałołt, to za chwila go niy bydzie… smacznego 🙂