Sztamfowany groch ze batatym (Purée batatowo-grochowe)

Szukołech¹ dzisiej czegosik, co by sie szło zjejś² do schabu we musztardzie, kery żech rychtowoł³ na mitag⁴– recept⁵ przidzie niyskorzi⁶. Je zima, a czytołech ôstatnio⁷, co to werci⁸ sie wtedy jejś groch, bo mo driny⁹ tela¹⁰ dobroci, że potyn niy trza wcale łajzić¹¹ do aptyki. Chciołech go ze czymś połōnczyć¹² , co by trocha złōmało jego smak i tak żech prziszoł na bataty- dlo tych, co ich niy znajōm, to sōm¹³ take słodke kartołfle¹⁴, kere przijechały dō nołs¹⁵, jak i tyn normalny kartołfel, ze Ameryki, ale sōm ôd tamtego zdrowsze. Wyszło danie lekko słodkawe i delikatne, co to idealnie pasuje do dobrze prziprawiōnego miysa abo i ryby.

Co potrza?

2 szolki¹⁶ (ôd kafeju) łuskanego grochu

1 batat (30-40 dkg)

2 łeżeczki majeranku

łeżka masła

sōl i pieprz

2 liście bobkowe¹⁷

4 szolki (ôd kafeju) wody

Na sōm poczōntek zalyjcie wrzōntkym tyn groch we jakim gorku i ôstołwcie¹⁸ go tak na jake 15 minut- stracōm¹⁹ sie bez to te składniki, co to by nos mōgły niypotrzebnie beczkować. Wylyjcie ta piyrszo²⁰ woda i wlyjcie 4 szolki, ô ftorych żech sam pryndzyj²¹ pisoł i zacznijcie tyn groch warzić. Wciepcie²² tam łeżeczka majeranku, 2 liście bobkowe i trocha pieprzu (sōl domy dopiyro na sōm kōniec). Batata ôbiercie²³, pokrejcie na mańsze kōnski²⁴ i dociepcie do tyj wody. Niech sie to tak 30-40 minut powarzi- aż groch bydzie miynki. Keby²⁵ Wōm sie na gōrze przi warzyniu zbiyrały szuminy²⁶, to je wyciepcie²⁷– niy bōjcie sie ô majeranek, co go tyż wyciepniecie, bo na kōniec go jeszcze trocha dosujymy²⁸. Wody je tak mało, bo idzie ô to, żeby tego grochu nie ôdcedzać, bo sie bez to marnuje kans zdrowych minerałōw, kere przełażōm do wody przi warzyniu. Jak już wszyjsko baje²⁹ miynke, to wciepcie tam soli, pieprzu, łeżeczka majeranku, łeżka masła i posztamfujcie³⁰. Za chwila jeszcze rołz dosmakujcie³¹ i… smacznego 🙂