Baniowoł inspiracja- zupa (Dyniowa inspiracja- zupa)

Niyrołz jak mie cojsik wejźnie, to we tyj kuchni tworza, choby jaki malyrz na ôbrołzku^¹: chyca jaki pōmysł, potyn miyszōm^², kōmbinuja, prōbuja… yno marasu^³ trocha mani jak u takego Jacksona Pollocka. Niby połra^⁴ składnikōw je normalno, ale jak czowiek dociepnie^⁵ do tego gruszka, trocha żurawiny i jako prziprawa, to sie robi cołkym inkszo geszichta^⁶.

Co potrza?

0,5 kg bani

2 markwie^⁷

4 kartołfle^⁸

2 gorście^⁹ żurawiny (joł żech doł świyżoł, ale mogecie dać tyż suszōnoł)

1 cebula

1 gruszka

3 łeżki oliwy

1 łeżka masła klarowanego

1 łeżka gańsiego^¹⁰ fetu

1 syrek topiōny – nojlepi śmiytankowy

ździebko^¹¹ gałki muszkatałowyj

ździebko chili

2 łeżeczki czubrycy

sōl i pieprz

kōnsek^¹² wyndzōnki^¹³

Do gorka wlyjcie^¹⁴ oliwa, dejcie^¹⁵ masło i zeszklijcie na tym cebula. Potyn wciepcie^¹⁶– pokrōne^¹⁷ byle jak- bania, kartołfle, marchew, ôbranoł gruszka, żurawina i tyż to trocha podpiyczcie. Zalyjcie wodōm (tak ze 1,5 litra), dociepcie gańsiego fetu, prziprawōw i niech sie to powarzi^¹⁸, aż kartołfle bajōm^¹⁹ miynke^²⁰. Bez tyn czas mogecie sie pokrołć wyndzōnka we kosteczka i jōm podpiyc. Potyn ta zupa trocha ochōdźcie^²¹, wciepcie tam syrek i to wszyjsko^²² blynderym zmiksujcie. Podgrzyjcie jeszcze trocha, dosmakujcie i biercie sie za jedzynie- po wiyrchu^²³ mogecie sie to posypać tōm podpiyczōnōm wyndzōnkōm. Smacznego 🙂