Kryjmzupa ze zelera (Selerowa zupa krem)

Moja Baba¹ zamarzōła² sie zupa ze pasternakym, ale jako żech go niy mōg³ nikaj znojś⁴, a moje ślypia⁵ we sklepie sie zatrzimały na zelerze, zrobiōła sie z tego zupa ze zelerym- niy bojcie sie, ta ze pasternakym jeszcze sam kedy przidzie 😉 Wciepowołech do gorka składniki jak jako heksa⁶, ale jak żech już ta zupa zjołd,⁷ to żech sie niy zamiyniōł ani we ksiyńcia, ani we żaba, to znaczy, że mogecie sie jōm spokojnie sprōbować. Dziynki gruszkōm nasza kryjmzupa je tako barzi słodkoł, curry dołwo ji⁸ trocha charakteru, a żurawina kans⁹ zdrowia- niyftorzi gołdajōm na nia nawet naturalny antybiotyk. Na zima bydzie łona idealno 🙂

Co potrza?

1 zeler

1-2 gruszki

1 cebula

łeżka masła klarowanego

kapka oliwy

suszonoł¹⁰ żurawina

trocha mōnki kukurydzianyj do zagynszczynia zupy

sōl i pieprz

prziprawa curry

Na maśle zeszklijcie cebula, kapnijcie do tego jeszcze trocha oliwy i wciepcie tam na chwila pokrōny¹¹ na byle jake kōnski¹² zeler- niy bydymy sie smolić¹³ ze krajaniym na mało kosteczka, bo przeca wszysko potyn i tak zmiksujymy. Zalyjcie to wodōm- tak żeby przikrōło tyn zeler i niech sie trocha powarzi. Mogecie tam tyż wciepnōńć trocha soli, pieprzu i curry. Jak już zeler bydzie miynki, dodejcie pokrōno gruszka. Wyłōnczcie na chwila, żeby trocha ochōdło¹⁴ i mogecie to zblyndować. Potyn postołwcie ta zupa zajś na piecu i rozfyrlejcie¹⁵ we zimnyj wodzie trocha mōnki kukurydzianyj (jak ji niy mołcie, to moge być i pszynno) i wlyjcie do gorka, żeby jōm zagyńścić- mōnka kukurydzianoł do¹⁶ nōm tyż taki fajny dodatkowy smak. Tera styknie yno ta zupa jeszcze dosmakować¹⁷ i mogecie sie już rychtować¹⁸ do jedzynia. Jak już kryjmzupa bydzie na talyrzu, to po wiyrchu¹⁹ posujcie²⁰ jōm żurawinōm i… smacznego 🙂