Gyszynk ze lasa (Leśny dar)

Mōm nadzieja, że żołdyn1 z Wołs2 niy wejźnie3 tego miana4 dosłownie i niy bydzie5 szukoł we lejsie6 pod krzokym7 takego kōnska maszkytōw. Licentia poetica moge sie trefić8 nawet we receptach9. Ze lasa niy bōły10 ani ôstrangi11, ani jagody, kere12 żech sam wciep13, ale za starego piyrwy14 to właśnie tam- a niy we zygrōdce15– szło je trefić16. To je ciasto bez pieczynia, a właśnie take recepty17 nojbarzi lubiymy, jak na dworze je hic18 i czowiek łajzi19 daleko ôd bratruły20. Niy za słodke, fajnie chōdne21, ze fataminami22… nic wiyncyj nōm nie trza23.

Co potrza?

300 g jagodōw- joł żech doł24 tych hamarykańskich

200 g ôstrangōw (niyftorzy gołdajōm25 na nie tyż dziady)

500 g mascarpōne

5 łeżek żelatyny

4-5 łeżek cukru

400 g petitkōw abo jakiś inkszych kyjksōw26

Narychtujcie27 sie wiynkszoł28 prostokōntnoł blacha i wyłōżcie jōm papiōrym do pieczynioł. Na spodek poukłołdejcie- jedyn przi drugim- kyjksy. Uwarzcie29 szklōnka wody ze dwiyma łeżkami cukru i ôzpuśćcie30 w ni31 dwie łeżki żelatyny. Jak woda leko ochōdnie32, wymiyszejcie jōm porzōndnie ze mascarpōne. Na poukłołdane kyjksy powciepujcie33 jagody, zalyjcie to masōm ze mascarpōne i wrojście34 do lodōwki, żeby trocha stynżało. Przetrzyjcie ôstrangi bez sitko- strasznie mie nerwujōm we deserech ichnie35 pestki. To, co ôstanie na sitku (pestki i trocha soku), wrojście do jakego garca, nalyjcie tam 3 szklōnki wody, wciepcie 2 abo 3 łeżki cukru i uwołrzcie- niy bydymy przeca marnowali tego smaku. Jak sie uwarzi, to przecedźcie, wytrzajście36 pestki, a do tego wywaru dejcie 3 łeżki żelatyny i wymiyszejcie. Niyskorzi wciepcie do tego jeszcze te przetarte ôstrangi. Wyciōngcie37 blacha ze lodōwki i na połowie wyłōżcie kyjksy i na to wlyjcie galaretka ze ôstrangōw. Tera na połra godzin do lodōwki. Jak już fajnie stynżeje, wyciōngcie (nojlepi na drugi dziyń) te ciasto ze blachy i przetnijcie na poła38. Na ta poła z kyjksami wciepcie poła ciasta bez kyjksōw na wiyrchu- nojlepi przetnijcie tyż tyn papiōr, ustołwcie jedna poła nad drugōm, symnijcie papiōr ze jednyj strōny, połōżcie jōm i jak bydziecie ściōngać reszta papiōru, to kładźcie wiyrchnioł warstwa na dolnoł. Niy je to ajnfachowe39, ale potyn mōmy take fajne warstwowe ciasto. Smacznego 🙂

1żaden

2Was

3weźmie

4nazwy

5będzie

6lesie

7krzakiem

8zdarzyć

9przepis

10były; ō- samogłoska w wymowie między o i u

11jeżyny; ô= ło

12które

13wrzuciłem

14dawniej

15ogrodzie

16spotkać

17przepisów

18upał

19chodzi

20piekarnika

21chłodne

22witaminami

23potrzeba

24dałem

25mówią

26herbatników

27przygotujcie

28większą

29zagotujcie

30rozpuśćcie

31niej

32ostudzi się

33powrzucajcie

34włóżcie

35ich

36wyrzućcie

37wyjmijcie

38pół

39proste

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*