Kura we ôrzechowyj zōłzie (Kurczak w sosie orzechowym)




Jakosik mie tak chyciōło1 na inspirowanie sie kuchniōm gruzińskōm, możno i skuli2 tego, że niydaleko moji chałpy3 je gruzińskoł piekarnia. Idzie tam kupić richtich4 fajny chlyb, kery wypiykajōm w takim specjalnym piecu, kery wyglōndo jak tako srogoł5, murowanoł beczka. We gruzinskyj kuchni je kans ôrzechōw i bez to tyn kurczak moge Wōm dać aby trocha wyobrażynia ô tym dalekim kraju.

Co potrza?

(styknie6 dlo 6-8 ludzi)

1,5 kg kurczaka (joł żech doł 0,5 kg piersi i 1 kg filetōw ze podudzi)

20 dkg ôrzechōw włoskich

1 srogoł7 abo 2 mańsze8 cebule

3 łeżki masła klarowanego

2-3 zōmbki czosku9

4 łeżki ôctu ze biołego wina

4-5 łeżek mōnki

Prziprawy:

sōl i pieprz

1,5 łeżeczki mielōnych ziorek10 kolyndry

2 łeżeczki koziyradki

2 łeżeczki szafranu imerytyjskego (tak po prołwdzie11, to je to starty kwiołtek aksamitki, kero na Ślōnsku mianujōm studyntkōm)

na gotowe danie idzie posypać trocha pokrōnyj12 natki pietruszki

Piersi kurczaka dejcie13 do gorka i zalyjcie zimnōm wodōm (2 litry) i niech sie pomału warzōm14– jak na wiyrchu15 bydzie sie zbierać piana, to jōm symnijcie16 i wyciepcie. Jak już zawrōm17, to aby ze pó godziny niech sie poblukoł18. Filety z podudziōw podsmołżcie na prawie suchyj patelni (leko19 yno20 nasmarujcie jōm ôlejym). Jak sie upiekōm, to dociepcie21 je do gorka, kaj22 sie warzōm piersi. Cebula zeszklijcie na maśle klarowanym, dejcie tam czosnek, prziprawy, mōnka i niech sie to trocha podpiecze. Ôrzechy poprażcie chwila na patelni, żeby nabrały lepszego smaku. Ôrzechy i cebula ze prziprawami zblyndujcie- nojlepi dejcie do tego tyż trocha wywaru ze piersi kurczaka. Miyso pokrejcie na mańsze kōnski, zblyndowanoł masa wymiyszejcie z wywarym, dosmakujcie i fertich23. Keby Wōm to bōło jeszcze za rzołdke24, to mogecie trocha zagyńścić ta zōłza mōnkōm. Takego kurczaka idzie zjejś ze chlebym abo jakōm żymłōm25, ale i ze klōskami abo nudlami.

Smacznego 🙂

1złapało; ō- samogłoska w wymowie między o i u

2z powodu

3domu

4naprawdę

5duża

6wystarczy

7duża

8mniejsze

9czosnku

10nasion

11naprawdę

12pokrojonej

13dajcie

14gotują

15górze

16zbierzcie

17zagotują

18powoli pogotuje

19lekko

20tylko

21dorzućcie

22gdzie

23gotowe

24rzadkie

25bułką




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*