KRUPNIOK RAJZUJE. Czyńść 1: Krupniok ratatuje (Podróże z kaszanką. Część 1: Ratatuj wspomagany kaszanką)




Jak żech bōł[1] we radiu, to sie mie jedyn chop zapytoł, co by szło zrobić ze krupniokym. Połra[2] receptōw[3] prziszło mi do łeba[4] w czasie audycji, ale potyn niy dało mi to spokoju i tak żech prziszoł[5] na tako całoł[6] seria, co to sie baje[7] nazywać: KRUPNIOK RAJZUJE.  Jako, że mie w te wakacje ciōngnie[8] do Francji, to ta wariacja na tymat ratatouille abo ratatuja (roztomajcie[9] sie to pisze) jōm łotworzi.[10] Krupniok prziszoł dō nos jakosik ze Niymiec abo Austrii- ciynżko pedzieć,[11] do kogo Ślōnsk wtedy należoł. Dopiyro potyn łod jakego ślōnskego masołrza[12] nauczyli sie go robić hadziaje.[13] Niy ma świniobicio bez krupniokōw, tak jak niy ma dnia bez słōńca. A jak mogymy sie nim cieszyć my, to mogōm i inksze[14] nołrody.[15] Sam znojdōm połra podpowiedzi, jak mogōm urozmaicić swoje narodowe jołdło. Robiynie krupniokōw łostawia[16] masołrzōm- chyba, że mie kedy ftory[17] nauczy- i we receptach byda korzystoł ze gotowego krupnioka i wierza, że kołżdy z Wołs[18] wiy[19], kaj sie kupić nojlepszego.
Ratatouille abo ratatuj to je znano i bardzo dobro potrawa ze Prowansji. Tera, jak we łogrōdku mōmy świyże warzywa, je na nia nojlepszo pora.

Co potrza?

2 cukinie
2 bakłażany
2 papryki
2 cebule
2-3 zōmbki czosku
6 tōmatōw[20]
12 łeżek[21] oliwy
4 łeżki łoctu[22]
1 łeżka cukru

Prziprawy:
Joł tam naciepoł[23] tego kans[24] i jak idzie o te prziprawy, to musicie sie wyprōbować, co Wōm nojbarzi[25] smakuje. Joł wciep- w wiynkszości bōły to świyże zioła (mogecie zamiast tego wciepnōńć 4 łeżki ziół prowansalskich):
4 łyżeczki tymianku
4 łyżeczki bazylii
4 łyżeczki szałwii
2 oregano
2 miynty
2 rozmarynu
2 majeranku

Bakłażana- je żech ciekawy, czy mo łon[26] jake ślōnsko miano[27]– pokrejcie[28] ze skōrōm we kostka, posypcie solōm i łodstołwcie,[29] żeby puściōł sok i bez[30] to niy bōł gorzki.
Do gorka wlyjcie oliwa, wciepcie pokrōno cebula i wyciśniynty czosnek i nich sie tam ze 30 sekund podsmołży.[31] Tera seblyczcie[32] krupniokowi skōra, pokrejcie i niech sie we garcu potańcuje ze cebulōm i czoskym- jerōnie[33], jako mi sie sam wcisła[34] poezyjoł.[35] Bakłażana opukejcie[36] i osuszcie. Pokrejcie cukinia, papryka, tōmaty i wszyske te warzywa wciepcie ze prziprawōma do gorka. Na sōm poczōntek papryka, bo je najtwardszo, a potyn nastympne[37] i niech sie to tera fajnie podusi, aże zmiynknie. Na koniec wlyjcie tam łocet, niech sie to połra razy bluknie[38] i fertich.[39]
Keby fto niy lubioł we kuchni eksperymyntôw i chcioł sie zrobić samego ratatuja, to niech wyciepnie ze receptu krupnioka. Choć joł bych Wołs namołwioł[40] na takego krupniokowego… 😉 Smacznego 😉

 

Krupniok ratatuje- małe

 

 

[1] był; ō- samogłoska w wymowie miedzy o i u

[2] kilka

[3] przepisów

[4] głowy

[5] wpadłem

[6] całą

[7] będzie

[8] ciągnie

[9] różnie

[10] ją otworzy

[11] ciężko powiedzieć

[12] rzeźnik

[13] nie Ślązacy

[14] inne

[15] narody

[16] zostawię

[17] któryś

[18] każdy z Was

[19] wie

[20] pomidorów

[21] łyżek

[22] octu

[23] wrzuciłem

[24] dużo

[25] najbardziej

[26] on

[27] nazwę

[28] pokrójcie

[29] odstawcie

[30] przez

[31] podsmaży

[32] rozbierzcie

[33] hm… można powiedzieć, że jest to coś w rodzaju: cholerka 😉

[34] wcisnęła

[35] poezja

[36] opłuczcie

[37] następne

[38] zabulgocze

[39] gotowe

[40] namawiał




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*