Golōnka ze piwym (Golonka piwna)

Mōmy pajździernik, a kedyjś bez1 duge lata gołdało2 sie na Ślōnsku na niego Oktōłber. A jak Oktōłber, to Oktōłberfest,  jak Oktōłberfest, to piwo, a nojlepszym kamratym3 łod piwa je golonka. Joł żech sie pomyśloł, że tych 2 kōmpanōw4 wciepna5 razym do gorka i niech się tam trocha pokōmpiōm.6 To bōł7 piyrszy rołz8, jak żech robiōł golōnka, ale musza pedzieć,9 że chyba byda dō ni niy rołz, niy dwa wrołcoł.10 Je to proste, niy je take słone, jak te gotowe golonki, je fajnie miynke, a do tego mołcie11 wywar, ze ftorego12 sie idzie potyn13 zrobić zupa- joł robiōł kapuśniōk, ale o tym to już opowiym kedy indzi14 😉

Co potrza?15

ze 3 kg golōnek- nojlepi tylnich, bo te ze przodku to majōm nirołz16 yno same kojści17 i fet.
1 abo 2 piwa  (zależy łod tego, jak lubicie tyn arōmat i ta leko18 goryczka)
połra19 ziorek ziela angelskego
połra listkōw bobkowych20 ( abo jak tyż niyftorzi21 gołdali: lorbelblatu)
połra ziorek pieprzu
sōl
2 łeżki mostrichu22
1-2 łeżki miodu
woda

Jak byjście sie potyn chcieli z tego zrobić zupa, to pod kōniec warzynia mogecie do tego wywaru wciepnōńć23 tyż ze 2 marchewki, pietruszka i zeler.24 Boryj25 łostołwcie26 sie do zupy. Joł do ni łostawiōł tyż jedne golonko, żeby bōło we środku tyż trocha miysa.27

Niyftorzi pyjklujōm28 te golōnki, mie sie jakosik niy chciało. Umōł żech je, wciep do garca, zaloł piwym i wodōm (muszōm być całe przikryte), wciep tam prziprawy i sie warzōły29 bez 2 godziny. Kebyście chcieli, to na łostatnie pó30 godziny mogecie tam wciepnōńć tyn grincojg.31
Potyn żech te golōnka wyciōng, ściōng żech ta tustoł32 skōra, położoł na blacha i rozgrzoł żech piec (funkcja grill abo jak łonyj33 niy mołcie, to sie go rozgrzyjcie na 200 stopni).
Mostrich żech pomiyszoł ze miodym  ( idzie tam wlołć34 tyż ze 2 łeżki wywaru i dać trocha soli) i tym żech fajnie posmarowoł te golōnki po wiyrchu.35
Doł żech je do pieca na jake pó godziny- ale jakbyjście widzieli pryndzy, że sie za mocno brōnołcōm,36 to je wyciōngcie- i po robocie. Do tego trocha mostrichu, chrzanu, jako bōłka i wiyncyj niy trza… no, może jeszcze kufel piwa 😉 Smacznego 🙂

Golonka ze piwym- małe

1przez

2mówiło

3kolegą

4kompanów

5wrzucę

6pokąpią

7był

8raz

9powiedzieć

10wracać

11mają Państwo 😉

12którego

13później

14kiedy indziej

15potrzeba

16nieraz

17kości

18lekką

19kilka

20laurowych

21niektórzy

22musztardy

23wrzucić

24seler

25por

26zostawcie

27mięsa

28peklują

29gotowały

30pół

31włoszczyzna

32tłustą

33jej

34wlać

35po wierzchu

36przypiekają

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *