Schab niy-byle-jaki (Schab niebanalny)




Jak żech szoł1 do sklepu (abo jak by to niyftorzi pedzieli2 : do kaufhauzu), to kupowołech te miyso na trocha inksze danie, ale jak żech napoczōn3 warzić, to mie cojsik naszło. Czowiek kōmbinuje, ale tak po prołwdzie4 nawet niy wiy, co to z tego wszyskego wyjdzie. Jak żech opiykōł miyso, to żech prziszoł na to, że we lodōwce sie chōdzi5 flaszka cydru i łon aże sie prosi, żeby go dolołć do brytfanki. Jak miyso sie dusiōło ze grincojgym,6 to żech sznupoł7 po befyju8 (choć te nasze befyje, to już niy sōm take jak piyrwy), coby znojś cojsik, co by szło dać do szałołtu9 i tak sie sam wziyna ta soczewica. Jabko? Leżało na fynsterbrecie10– co sie miało marnować. I tak sie z tego wziyno cołke niy-byle-jake danie.

Co potrza?

1 kg schabu

1 cebula

szklōnka cydru (niy wytrawnego!)

1 zōmbek czosku abo trocha czosku niedzwiedziego

połra liści bobkowych11

ze 2 łeżki masła klarowanego

1 porcja grincojgu (marchew, pietruszka, zeler i boryj12)

szklōnka zielōnyj soczewicy

1 jabko

połra łeżek mojōnezu

150 ml gynstyj13 śmietōnki (moge być 12%)

połra łeżek mōnki pszynny

sōl i pieprz

Na patelnia żech wciep mało łeżeczka masła klarowanego, tela, żeby niy bōła za sucho, ale tyż żeby niy bōło go za kans14, bo żech sie pomyśloł, że jak go dōm mani15, to przi podpiykaniu schabu (w całojści) niy bydzie to tak pierzińsko pyrskać.16 I to sie nawet udało, na srogim17 łogniu żech go podpiyk ze kołżdyj strōny, a kuchnia niy bōła zmaraszōno.18 Niyskorzij19 żech tyn schab łodstawiōł na chwila, żeby te soki z miysa trocha wlazły nazod rajn.20 Bez tyn czas na reszcie masła klarowanego we brytfance żech zeszklōł pokrōno21 cebula i wlołech dō ni szklōnka cydru i szklōnka wody. Wciepłech do tego miyso, dołech tam pieprzu, liście bobkowe i posułech22 trocha czoskym niydźwiedzim. Sōl dołech dopiyro na sōm kōniec, do zōłzy. Przikrōłech brytfanka i to sie tak ze godzina pykało na małym łogniu- co jakiś czas idzie23 tyż łobrōcić te miyso na drugo strōna.

Po godzinie dociepłech do tego marchew, pietruszka i zeler- boryj żech sie łostawiōł do szałołtu.

W tym czasie uwarzōłech tyż zielōno soczewica- tak ze 20-25 minut, żeby fajnie zmiynkła.

Jak grincojg bōł miynki, to żech go wyciōng na deska, pokrajōł i wciep do miski. Miyso żech odłożōł na chwila na talyrz, żeby ochōdło i lepi sie je krajało.

Do zōłzy dołech ze 2 łeżki mōnki rozfyrlanyj24 ze zimnōm wodōm i śmietōnka ( wymiyszejcie jōm pryndzyj ze 1 kelniōm25 zōłzy, żeby sie niy ściekła26). Dosmakowoł żech jōm solōm i pieprzym i wyciepnōł bobkowe liście.

Miyso pokrajoł żech na plastry i wciep do zołzy, żeby sie podgrzoło i przegryzło.

Idymy nazod do szałołtu: boryj i jabko pokrołech na małe kōnski27 i dołech do miski, we ftoryj bōła już reszta grincojgu. Dociepnōł żech do tego łodcedzōno soczewica, połra łeżek majōnezu, trocha pieprzu, soli i porzōndnie żech wymiyszoł.

Nareszcie prziszoł czas na jedzynie. Na talyrz idzie szałołt, kōnsek schabu łoblōny28 zōłzōm i… smacznego 🙂

Schab niy-byle-jaki- małe

1szedł

2powiedzieli

3zacząłem

4naprawdę

5chłodzi

6włoszczyzną

7myszkować po szafkach

8dawniej był w kuchni jeden uniwersalny mebel a’ la kredens, dziś bardziej w znaczeniu mebli kuchennych

9sałatka

10parapet

11laurowe

12por

13gęstej

14dużo

15mniej

16pryskać

17dużym

18pobrudzona

19później

20do środka

21pokrojoną

22posypałem

23można

24roztrzepanej

25chochlą

26zwarzyła

27kawałki

28oblany




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*