Baniowoł inspiracja- zupa (Dyniowa inspiracja- zupa)

Niyrołz jak mie cojsik wejźnie, to we tyj kuchni tworza, choby jaki malyrz na ôbrołzku1: chyca jaki pōmysł, potyn miyszōm2, kōmbinuja, prōbuja… yno marasu3 trocha mani jak u takego Jacksona Pollocka. Niby połra4 składnikōw je normalno, ale jak czowiek dociepnie5 do tego gruszka, trocha żurawiny i jako prziprawa, to sie robi cołkym inkszo geszichta6.

Co potrza?

0,5 kg bani

2 markwie7

4 kartołfle8

2 gorście9 żurawiny (joł żech doł świyżoł, ale mogecie dać tyż suszōnoł)

1 cebula

1 gruszka

3 łeżki oliwy

1 łeżka masła klarowanego

1 łeżka gańsiego10 fetu

1 syrek topiōny – nojlepi śmiytankowy

ździebko11 gałki muszkatałowyj

ździebko chili

2 łeżeczki czubrycy

sōl i pieprz

kōnsek12 wyndzōnki13

Do gorka wlyjcie14 oliwa, dejcie15 masło i zeszklijcie na tym cebula. Potyn wciepcie16– pokrōne17 byle jak- bania, kartołfle, marchew, ôbranoł gruszka, żurawina i tyż to trocha podpiyczcie. Zalyjcie wodōm (tak ze 1,5 litra), dociepcie gańsiego fetu, prziprawōw i niech sie to powarzi18, aż kartołfle bajōm19 miynke20. Bez tyn czas mogecie sie pokrołć wyndzōnka we kosteczka i jōm podpiyc. Potyn ta zupa trocha ochōdźcie21, wciepcie tam syrek i to wszyjsko22 blynderym zmiksujcie. Podgrzyjcie jeszcze trocha, dosmakujcie i biercie sie za jedzynie- po wiyrchu23 mogecie sie to posypać tōm podpiyczōnōm wyndzōnkōm. Smacznego 🙂

Baniowoł inspiracja-małe

1ô=ło

2mieszam

3bałaganu, brudu

4kilka

5dorzuci

6historia, opowieść

7marchwie

8ziemniaki

9garście

10gęsiego

11szczyptę

12kawałek

13boczku wędzonego

14wlejcie

15dajcie

16wrzućcie

17pokrojone

18pogotuje

19będą

20miękkie

21ostudźcie

22wszystko

23na górze

Post Author: klaudiuszkaufmann

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *