Miszōng ze baniōm (Miszmasz z dynią)

Dobrze mieć zamrożōne1 trocha bani, bo jak na wiosna Wōm sie ji zachce, to mołcie2 już ôbiołd3 prawie fertich4. Jak żech rychtowoł5 ta zupa, to czasu za wiela niy bōło, a wtynczos sie czowiek myśli, co tam moł w dōma6 leżeć. Bōło7 trocha zelera8 naciowego, kōnsek boreju9 i jedyn banan… zaroz10 w gowie mi sie narychtowoł recept i żech sie wziōn do roboty. Z tego boreju bōło wiyncyj zielōnego, jak biołego- biołe poszło do szałołtu11, a zielōnego szkoda mi bōło wyciepnōńć, bo tam przeca tyż sōm roztomajte 12fetaminy13 i tak tyn mōj miszōng zrobiōł sie ździebko14 zielōny. Moja Teściowo, jak żech potyn z niōm godoł15, to pedziała, że ôna by te zielōne wyciepła16 i tak to sie ôkołzało17, że ziyńć je barzi szporowliwy18 ôd Teściowyj 😉

Co potrza?

0,5 kg bani

1/3 mańszego19 boreju

połra łodygōw ôd zelera naciowego

1 banan

1 cebula

trocha oliwy

1 łeżeczka tymianku

0,5 łeżeczki kurkumy

ździebko20 gałki muszkatałowyj

ździebko chili

połra listkōw lubczyku (jak mołcie suszōny, to mogecie dać tak ze pó łeżeczki)

sok ze poły citrōłny21

sōl i pieprz

prażōne mandle22 na wiyrch

Na oliwie zeszklić cebula, niyskorzi23 dociepnōńć do tego pokrajanoł24 bania, boryj i zeler. Jak to sie tak chwila podsmażi, to wlyjcie tam 0,7- 1litra wody, wciepcie prziprawy i niech sie powarzi25. Jak już bania i zeler bydōm miynke, to mogecie to zblyndować, wlołć26 sok ze citrōłny, dosmakować i fertich. Jak już bajecie mieć ta kryjmzupa na talyrzu, to mogecie to po wiyrchu27 posuć28 prażōnymi mandlami abo, jak takich niy mołcie, to płatkami ze mandli. A jak już sie szczelicie takoł zupa, to sie mogecie potyn nawet poasić29, żejście naparszczyli30 wegańske danie. Smacznego 🙂

1ō- samogłoska w wymowie między o i u

2macie

3obiad, ô= ło

4gotowy

5przygotowywałem

6domu

7było

8selera

9kawałek pora

10zaraz

11sałatki

12różne

13witaminy

14trochę

15rozmawiał

16wyrzuciła

17okazało

18bardziej oszczędny

19mniejszego

20szczyptę

21cytryny

22migdały

23później

24pokrojoną

25pogotuje

26wlać

27na górze

28posypać

29pochwalić

30ugotowali

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *