Miszōng ze baniōm (Miszmasz z dynią)

Dobrze mieć zamrożōne¹ trocha bani, bo jak na wiosna Wōm sie ji zachce, to mołcie² już ôbiołd³ prawie fertich⁴. Jak żech rychtowoł⁵ ta zupa, to czasu za wiela niy bōło, a wtynczos sie czowiek myśli, co tam moł w dōma⁶ leżeć. Bōło⁷ trocha zelera⁸ naciowego, kōnsek boreju⁹ i jedyn banan… zaroz¹⁰ w gowie mi sie narychtowoł recept i żech sie wziōn do roboty. Z tego boreju bōło wiyncyj zielōnego, jak biołego- biołe poszło do szałołtu¹¹, a zielōnego szkoda mi bōło wyciepnōńć, bo tam przeca tyż sōm roztomajte ¹²fetaminy¹³ i tak tyn mōj miszōng zrobiōł sie ździebko¹⁴ zielōny. Moja Teściowo, jak żech potyn z niōm godoł¹⁵, to pedziała, że ôna by te zielōne wyciepła¹⁶ i tak to sie ôkołzało¹⁷, że ziyńć je barzi szporowliwy¹⁸ ôd Teściowyj 😉

Co potrza?

0,5 kg bani

1/3 mańszego¹⁹ boreju

połra łodygōw ôd zelera naciowego

1 banan

1 cebula

trocha oliwy

1 łeżeczka tymianku

0,5 łeżeczki kurkumy

ździebko²⁰ gałki muszkatałowyj

ździebko chili

połra listkōw lubczyku (jak mołcie suszōny, to mogecie dać tak ze pó łeżeczki)

sok ze poły citrōłny²¹

sōl i pieprz

prażōne mandle²² na wiyrch

Na oliwie zeszklić cebula, niyskorzi²³ dociepnōńć do tego pokrajanoł²⁴ bania, boryj i zeler. Jak to sie tak chwila podsmażi, to wlyjcie tam 0,7- 1litra wody, wciepcie prziprawy i niech sie powarzi²⁵. Jak już bania i zeler bydōm miynke, to mogecie to zblyndować, wlołć²⁶ sok ze citrōłny, dosmakować i fertich. Jak już bajecie mieć ta kryjmzupa na talyrzu, to mogecie to po wiyrchu²⁷ posuć²⁸ prażōnymi mandlami abo, jak takich niy mołcie, to płatkami ze mandli. A jak już sie szczelicie takoł zupa, to sie mogecie potyn nawet poasić²⁹, żejście naparszczyli³⁰ wegańske danie. Smacznego 🙂