Hańdyk we bazyliowo-pistacjowyj zōłzie (Indyk w sosie bazyliowo-pistacjowym)

Tyn hańdyk (abo jakby to inksi¹ padali²: puta) je richtich³ prosty we rychtowaniu⁴. Połra⁵ składnikōw⁶ sie wciepuje⁷ do gorka i fertich⁸, nawet niy idzie pedzieć⁹, że to je jake wynołkwiane¹⁰ danie, ale smak moł¹¹ wyjōntkowy.

Co potrza?

1 kg piersi ze hańdyka

gorść¹² listkōw bazyli

gorść pistacjōw

zōmbek czosku

3 łeżki whisky abo kōniaku

sōl i pieprz

330 ml śmietōnki (18%)

trocha mōnki do zagynszczynia zōłzy

Hańdyka posōlcie, popieprzcie, podpiyczcie ze wszyjskich strōn na leko natłuszczōnyj patelni i przeciepcie¹³ do brytfanki. Zagrzyjcie we jaki kelni¹⁴ abo gorczku¹⁵ trocha tego sznapsa¹⁶, podpołlcie¹⁷ i ôblyjcie miyso- dejcie sie pozōr¹⁸, żebyjście sie niy przipiykli. Jak sie zagasi¹⁹, to wlyjcie tam trocha wody, wciepcie bazylia, ôbrane pistacje, przikryjcie i niech sie to aby godzinka na małym ôgniu popykoł²⁰. Niyskorzi²¹ wyciōngcie miyso, zmiksujcie zōłza i dejcie²² śmiytōnki (mogecie jōm pryndzyj²³ trocha zahartować- dejcie dō ni połra²⁴ łeżek ciepłyj zōłzy i zamiyszejcie). Terozki mogecie nasza zōłza zagrzołć, trocha ôdparować, a jak by Wōm sie ôna zdała trocha za rzołdkoł²⁵, to mogecie sie rozfyrlać²⁶ we jaki szolce²⁷ we zimnyj wodzie trocha mōnki, wlołć²⁸ do brytfanki i warzyć aż fajnie zgynstnieje. Dosmakujcie, wciepcie tam nazod²⁹ miyso i fertich. Do tego idzie zjejś klōski, nudle³⁰, ryż abo i co Wōm sie spodoboł. Smacznego 🙂