Wiśnia w szokoladzie (Tort wiśniowo-czekoladowy)

Na gyburtstagu¹ musi być torta i niy ma sie co sam dugo na tyn tymat ôzpisywać²– no chyba, że mołcie cztyry iksze³ zorty⁴ ciastōw⁵ i za dużo by Wōm⁶ ôstało⁷ 😉

Joł ôstatnio lubia eksperymyntować (nic nowego) i niyrołzki⁸ wyłajżōm⁹ z tego take maszkyty¹⁰, że aże sie sōm¹¹ dziwia. Tu chciołech mieć pośrodku torty syrnik na zimno- nawet go widać na zdjyńciu. Na wiyrchu żech trocha poszaloł z bōmbōnami¹², ale mogecie dać sam¹³ yno trocha ślagzany¹⁴.

Co potrza?

Biszkopt:

6 jajec

5 łeżek mōnki¹⁵

1 łeżka kakao

6 łeżek cukru

2 płaske łeżeczki proszku do pieczynia

Syrnik:

400ml syrka hōmogynizowanego- nojlepi naturalnego

330 śmiytōnki krymōwki

2 galaretki wiśniowe

Masa:

1 szokolada gorzkoł

1 syrek mascarpōne

mały dżym wiśniowy

Do postrojynia mogecie tyż sie wziōńć jakich bōmbōnōw.

Nojlepi rychtowanie¹⁶ tyj tory rozłōżcie sie na dwa dni. Przesiyjcie mōnka, kakao i proszek do pieczynia. Ubijcie biōłka ze cukrym na sztywnoł piana i pomału dodołwejcie¹⁷ żōłtka. Potyn na nojmańszych¹⁸ ôbrotach abo yno samymi łopatkami przi wyłōnczōnym mikserze wmiyszejcie mōnka, kakao i proszek. Wlyjcie to na forma do tortōw i wrojście¹⁹ do bratruły²⁰ nagrzōnyj do 160 stopni na 40 minut. Jak już tyn biszkopt baje²¹ upieczōny, wyciōngcie go, przewrōćcie ta forma do gōry dnym i ściepcie ze 20-30 cm na stōł- żeby nōm te ciasto niy opadło. Biszpot niech sie tera chōdzi²².

Bierymy sie za syrnik. Ôzpuście²³ dwie galaretki we 300-400 ml uwarzōnyj wody i ochōdźcie. Ubijcie śmiytōnka, niyskorzi dejcie²⁴ dō ni syrek hōmogynizowany i ochōdzōnoł galaretka. Wrojście to do lodōwki, żeby trocha zaczło²⁵ tynżeć.

Biszkopt przekrajcie na dwa placki, spodek wrojście nazod do formy, posmarōjcie dżymym i wylyjcie na to masa syrnikowoł. Na gōra wciepcie drugi placek biszkoptu i całojść niech idzie na połra godzin do lodōwki- nojlepi na całoł noc.

Ôzpuście szokolada we jaki misce nad gorkym ze wrzōncōm wodōm i pomiyszejcie jōm ze syrkym maskarpōne. Wyciōngcie biszkopt ze formy i posmarujcie ôd niego gōra i boki masōm szokoladowōm- nojlepi na boki nakłodejcie jōm szpricōm²⁶, kerōm na gōrze mogecie niyskorzi zrobić tyż połra gryfnych dekoracji. Poukłołdejcie jeszcze na wiyrchu²⁷ połra bōmbōnōw i fertich²⁸. Smacznego 🙂