Kura we ôrzechowyj zōłzie (Kurczak w sosie orzechowym)

Jakosik mie tak chyciōło¹ na inspirowanie sie kuchniōm gruzińskōm, możno i skuli² tego, że niydaleko moji chałpy³ je gruzińskoł piekarnia. Idzie tam kupić richtich⁴ fajny chlyb, kery wypiykajōm w takim specjalnym piecu, kery wyglōndo jak tako srogoł⁵, murowanoł beczka. We gruzinskyj kuchni je kans ôrzechōw i bez to tyn kurczak moge Wōm dać aby trocha wyobrażynia ô tym dalekim kraju.

Co potrza?

(styknie⁶ dlo 6-8 ludzi)

1,5 kg kurczaka (joł żech doł 0,5 kg piersi i 1 kg filetōw ze podudzi)

20 dkg ôrzechōw włoskich

1 srogoł⁷ abo 2 mańsze⁸ cebule

3 łeżki masła klarowanego

2-3 zōmbki czosku⁹

4 łeżki ôctu ze biołego wina

4-5 łeżek mōnki

Prziprawy:

sōl i pieprz

1,5 łeżeczki mielōnych ziorek¹⁰ kolyndry

2 łeżeczki koziyradki

2 łeżeczki szafranu imerytyjskego (tak po prołwdzie¹¹, to je to starty kwiołtek aksamitki, kero na Ślōnsku mianujōm studyntkōm)

na gotowe danie idzie posypać trocha pokrōnyj¹² natki pietruszki

Piersi kurczaka dejcie¹³ do gorka i zalyjcie zimnōm wodōm (2 litry) i niech sie pomału warzōm¹⁴– jak na wiyrchu¹⁵ bydzie sie zbierać piana, to jōm symnijcie¹⁶ i wyciepcie. Jak już zawrōm¹⁷, to aby ze pó godziny niech sie poblukoł¹⁸. Filety z podudziōw podsmołżcie na prawie suchyj patelni (leko¹⁹ yno²⁰ nasmarujcie jōm ôlejym). Jak sie upiekōm, to dociepcie²¹ je do gorka, kaj²² sie warzōm piersi. Cebula zeszklijcie na maśle klarowanym, dejcie tam czosnek, prziprawy, mōnka i niech sie to trocha podpiecze. Ôrzechy poprażcie chwila na patelni, żeby nabrały lepszego smaku. Ôrzechy i cebula ze prziprawami zblyndujcie- nojlepi dejcie do tego tyż trocha wywaru ze piersi kurczaka. Miyso pokrejcie na mańsze kōnski, zblyndowanoł masa wymiyszejcie z wywarym, dosmakujcie i fertich²³. Keby Wōm to bōło jeszcze za rzołdke²⁴, to mogecie trocha zagyńścić ta zōłza mōnkōm. Takego kurczaka idzie zjejś ze chlebym abo jakōm żymłōm²⁵, ale i ze klōskami abo nudlami.

Smacznego 🙂