Karczek i inksi (Karczek z dodatkami)




Bōł żech wczora u kōmratki1, kero warzōła we tadżinie (to taki marokański gornek ze gliny). I tak mie to zainspirowało, że żech dzisiaj powciepowoł do gorka wszyjske składniki (tam tyż sie tak robi), postawiōł żech to na połra godzin na piecu i mitag2 bōł gotowy 😉

Co potrza?

1,5 kg karczku

500 g pieczarkōw

2 czerwōne papryki

1 srogi3 batat

4-6 kartołfli

łeżka mostrichu4

łeżka oregano

łeżka czubrycy zielōnyj

połra listkōw limōnki kaffir (abo połra łeżek soku ze citrōłny5)

sōl i pieprz

2 zōmbki czosku

połra łeżek oliwy (jo żech mioł tako prziprawiōno rozmarynym, jałowcym, tymiankym i majerankym- a Wy mogecie dociepnōńć ździebko tych prziprawōw do normalnyj oliwy)

łeżka masła klarowanego

Dziyń pryndzyj posmarowołech miyso oliwōm ze prziprawami, wyciśniyntym czoskym, mostrichym i ôstawiōłech na całoł noc.

Na drugi dziyń przipiyk6 żech tyn karczek ze wszyjskich strōn na łozgrzōnyj7 fest8 patelni i wciep9 żech do gorka. Na gōra prziszły we wymiyszanych warstwach pieczarki, pokrōny batat i kartołfle, papryka. Na gōra posułech prziprawy i tak żech to postawiōł na 2-3 godzinki na małym ôgniu na piec (gornek przikryty pokrywkōm).

Potyn mogecie jeszcze yno zagyńścić ta zōłza (kans wody wypłynie ze tych warzyw i miysa) mōnkōm i brać sie za jedzynie. U mie wszyjske smaki fajnie poprzechodziōły jedyn do drugego, miyso bōło fajnie soczyste… Smacznego 🙂

1koleżanki

2obiad

3duży

4musztardy

5cytryny

6przypiekłem

7rozgrzanej

8mocno

9wrzuciłem




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*